Shillong, Jymmang 17
Ka khubor na ki pulit ba la ïohlum ha ka Sngi Thohdieng ka ïathuh ba uwei u nongshong shnong ba sah ha Shillong u la ujor ba ha ka 29 tarik Ïaïong, 2024, u la don uwei u briew uba la pynithuh ïalade ba u dei u Jayanta Bora na ka HDFC, Khanapara, Guwahati, bad ryngkat bad u, la wan lang sa san ngut kiwei pat.
Ki pulit ki la ong ba utei u nongshong shnong u la ujor ba kitei ki hynriew ngut ki la knieh jubor ïa ka kali jong u kaba dei ka Grand i10 kaba don ïa u nombor ML-05S-3862. Ha kajuh ka por, la ong ba kitei ki hynriew ngut ki la pyntip ha utei u nongshong shnong ba u dei ban siew T. 40,000 khnang ba un ïoh biang ïa katei ka kali.
Kham hadien, ki pulit ki la ong ba utei u nongshong shnong u la ïoh jingtip na ka HDFC Bank, Rukmini Gaon Branch, Guwahati, ba ym don satia uno-uno uba kyrteng u Jayanta Bora uba trei ha kane ha ka tnat treikam jong ka Bank.
