Shillong, Jymmang 19
Ka Standing Choir Khasi Jaiñtia Presbyterian Synod Sepngi ka la rwai da ka ktien Khasi ryngkat ki jingtem tynrai ha ka Jingïaseng kaba ïakynduh shisien ar snem jong ka 4th Biennial Session North East India Christian Council (NEICC) kaba dei ka kynhun jong baroh ki Balang Khristan (Protestant) hapoh ka thaiñ Shatei Lam Mihngi kaba la sdang ha ka 16 tarik bad pynkut ha ka 19 tarik Jymmang 2024 kaba dei ka Sngi U Blei ha Jalukie Town Local Baptis, Nagaland. Kane ka jingrwai tynrai ba la rwai da ki samla jong ka KJP Synod Standing Choir ka la pynshohbiej ïa ki ‘riewngeit jong ki Balang bapher-bapher khamtam ïa ki ‘riewngeit ha Nagaland.
Haba ki samla ki ïeng ban rwai la ïohi ba ki kynthei ki sem arliang ryngkat ka tawah ryndia bad ki shynrang ruh ki tawah da ka ryndia ba lieh.
Ha kane ka jingïaseng, ki samla na ka KJP Synod Mihngi Standing Choir ruh ka la ïoh ban shim bynta lang.
Ki don haduh 37 tylli ki kynhun Balang kiba dei ki dkhot bapura ha ka North East India Christian Council (NEICC), bad na Meghalaya ki don 8 tylli kiba kynthup ïa ka KJP Synod Sepngi, KJP Synod Mihngi, Ri Bhoi Synod, Church of God (Meghalaya and Assam), Church of God (Ecclesia) Church of North India, North East India, Christ National Church, Garo Baptist Convention.
Katba ki kynhun kiba shu ïasoh ki don 18 tylli kynthup 8 tylli na nongbah Shillong.
Ka NEICC ka don ïa ka Union Christian College (UCC) ha Umïam, Ri Bhoi District kaba la ïoh jingithuh da ka Sorkar Meghalaya ha ka Deficit kaba pynïasoh ruh bad ka North Eastern Hill University (NEHU).
Katkum ka jingïoh lum jingtip, ha u snem 1936 ki nongïalam Balang bapher-bapher ki la ïakynduhlang ha Shillong ha kato ka por kaba dang hap ha ka jingpeit ka Assam ban tehsong ban thaw ïa kane ka kynhun NEICC kaba don ïa ka jaka treikam mynta ha Shillong.
