Shillong, Jymmang 19
Ka Sorkar Jylla kan sa pynmih ‘tender’ thymmai ynda la dep ka ilekshon MP ban khot biang ïa ki kompani kiba thmu ban ïashimbynta na ka bynta ban pynïaid ïa ka 108 Ambulance.
Kumba ka long mynta ïa ka jingshakri 108 Ambulance la shimti shwa shipor da ka NHM hapoh jong ka tnat ka koit ka khiah.
Ka tyllong khubor ka ïathuh ba ïa ka ‘tender’ yn sa khot thymmai biang, bad ïa kane yn sa leh tang shu kut ka ilekshon MP kata hadien ka 4 tarik u Jylliew.
“Ki jingpynkhreh ki la dep bad kaba sah ka long ban pynmih ïa ka ‘tender’ kaba thymmai,” la ïathuh ka tyllong khubor.
Lah ban pynkynmaw ba ka Sorkar Jylla ka la rai ban khot ‘tender’ biang ban jied ïa ka kompani ban pynïaid ïa ka 108 Ambulance namar ba kim pat biang ki kot ‘tender’ kiba la phah da ki kompani kiba ïashimbynta ha ka ‘tender’ kaba la pynmih lyngba ka National Health Mission mynshem snem.
Ha ka ‘tender’ kaba mynshwa, ki la don 7 tylli ki kompani kiba ïashimbynta kiba kynthup ïa ka Emergent Global Services, Kubera Solutions Pvt Ltd, Pashupatinath Distributors Pvt Ltd (PDPL), Ziquitza Healthcare Pvt Ltd, Medulance Healthcare Pvt Ltd, Jai Ambe Roadline Pvt Ltd bad Kria Healthcare Pvt Ltd.
Ha ka jingshisha, ka tnat ka koit ka khiah ka kwah ban pyndep noh ïa kane ka kam ha u Lber 2024 khnang ban ïoh ïa ka kompani kaba thymmai ban shimti bad ai jingshakri ha ka liang ka 108 Ambulance. Pynban namar ka jingbym lah ban pyndep la buhteng shwa namar ka wan noh sa ka ilekshon MP ha kine ki lai bnai naduh u Lber haduh u Jylliew.
