New Delhi, Jymmang 19
U Myntri Rangbahduh ka ri, u Narendra Modi ha ka Sngi U Blei u la pynpaw ka jingsngewkhia halor ki khubor ba ïadei bad ka ‘helicopter’ kaba kit ïa u President ka Iran, u Ebrahim Raisi uba la jah rngai hadien ka jingthut ha ka por ba hiar khyndew ha ki bynta ka thaiñ Shatei Lam Sepngi jong ka Iran, bad ong ba ka India ka don ha syndah bad ki nongshong shnong ka Iran ha kum kane ka por.
Ha ka rynsan lad pathai ‘X’, u Myntri Rangbahduh u la thoh, “Ka jingsngewkhia kaba jur halor ki khubor ba ïadei bad ka ‘helicopter’ u President Raisi mynta ka sngi. Ngi don ha syndah bad ki nongshong shnong ka Iran ha kum kane ka por bad duwai na bynta ka jingmanbha jong u President bad kiba don lang bad u.”
Katkum ki lad pathai khubor ka Iran, ka ‘helicopter’ kaba kit ïa u President Raisi lem bad ki heh ophisar ha ki bynta ka thaiñ Shatei Lam Sepngi jong ka Iran ka la hap khlem kino-kino ki jingtip haduh mynta la ka long ha ka liang ka jingmynsaw ne jingjulor.
U President Raisi u dang wanphai na ka jingïalang ban plie ïa ka Dam ha ki khappud ka Iran bad Azerbaijan bad hadien kane, ka ‘helicopter’ ka la hap katba ka dang hiar khyndew ha ka thaiñ Varzaqan ha ka Sngi U Blei, la ong ka IRNA.
U Myntri kam bar-ri, u Hossein Amirabdollahian, u Lat ka East Azarbaijan Province, u Malek Rahmati, u nongïalam duwai Tabriz ha ka Sngi Thohdieng, u Hojjatoleslam Al Hashem lem bad kiwei pat ki la don ha katei ka ‘helicopter’.
La dep ban phah ruh ïa ki kynhun ïarap sha katei ka thaiñ bad ka jingwad ka dang ïai bteng. Hynrei ka jingdum lyoh bad ka jinglong-jingman jong ka jaka ka la buh jingeh shi kat dei ha ka liang ban wad.
U Myntri ka tnad Interior, u Ahmad Vahidi u la ong ha ka Iran State Television ba namar ka jinglong-jingman ka suiñ bneng, kan shim por ïa ka kynhun Search & Rescue ban poi sha jaka ba hap katei ka ‘helicopter’.
U la pynpaw ka jingkyrmen ba katei ka kynhun shen kan sa poi kloi sha katei ka jaka bad phah shuh ïa ki jingtip. U Myntri ka tnad ka koit ka khiah, u Bahram Einollahi, uba don lang ha katei ka thaiñ u la ong ba baroh ki tiar jingsumar, ba kynthup ïa ki ‘Ambulance Bus’, doktor ba la pyntbit kyrpang la dep ban phah sha katei ka jaka ba hap ka ‘helicopter’ ban ïoh ïarap ïoh don kiba mynsaw.
U President ka Iranian Red Crescent Society (IRCS), Pir-Hossein Koulivand u la ong ba ka jingdon jong ki kynhun ïarap ha ka thaiñ la phah shuh sa arshah, kata na ka 20 sha ka 40. U la kdew ba ki kynhun ki mad jingeh namar ka jinglong-jingman ka suiñ bneng bad ka jaka ka long kaba jwat ban sam lyngba, hynrei ka jingwad ka dang bteng.
Shuh shuh u Koulivand u la bynrap ba ki kynhun ïarap ki la pyndonkam ïa ki ‘drone’ ban ïarap wad, hynrei ka jinglong-jingman ka suiñ bneng ka la buh jingeh shibun ban pynlong ïa ka jingwad na suiñ.
