Nongstoiñ, Jymmang 19
Da ka jingthmu ban wanrah biang ïa ka shong suk shong shngaiñ ha ka imlang-sahlang khamtam ban rat dyngkhong ïa ki kam sniew, ki dkhot ka Hynñiewtrep Youths’ Council (HYC) ha ka janmiet jong ka Sngi U Blei ki la hiar biang sha ki bynta ka Ïew Nongstoiñ ban pynlong ïa ka jingkhynra drok ha kane ka jaka.
Ki nongkitkam ka HYC ki la ong ba ki la hiar ban khynra drok ha them Ïew Nongstoiñ, ki Park lem bad kiwei ki jaka ha kylleng ka Ïew Nongstoiñ hadien ba la ïoh jingujor na ki paidbah halor ka jingdon jong kiba die bad jingdih drok ka jur bha ha ka Sngi U Blei.
Ki la ïathuh ruh ba ha katei ka jingleit khynra ka seng ka la ïoh ban beh wat la ki la phet, hynrei ka seng ka la ïoh bat kumba phra ngut eiei na ki. Nalor kata, ka seng ka la ïoh ban kurup ïa ki drok kiba ki pyndonkam bad hadien kane, la thang noh ïa ki.
“Ka seng ka la pynpaw ka jingsngewdiaw haba ïohi ba wat ha ka Sngi U Blei ruh ki kam jakhlia ha ïew ki jyllei ym tang ka kam drok hynrei wat ki kam khalai, khaïi met, bad jingïadih kyiad,” la ong ki nongkitkam ka HYC.
Ki la ong ruh, “Ngi pynpaw ka jingsngewdiaw ïa ka lawei ki samla ba ngi lap ruh ïa ki tiar pynmynsaw. Ka seng kan ïai buddien bad kan ïai khynra shuh shuh.”
Na ka liang ka seng, ka la thang ïa ki drok ba ïoh kurup bad ka la sneng bad kyntu kynpham ïa ki samla ba kin kylla ba mut noh.
Ka HYC ka kyntu jur ïa ki trai dukan ba kim dei ban pynsah briew ha ïew.
Shuh shuh ka seng ka kyrpad ïa ki paidbah ban ïatreilang ban rat dyngkhong ïa kine ki jingsniew bad ban pyntip sha ki dkhot ka HYC ban leh katba lah ban wanrah ïa ka suk ka saiñ ha ka thaiñ khamtam ïa ki nongshong dukan ha ïew kiba la syier mynsiem.
