Shillong, Jymmang 19
Ka bynta kaba san jong ka ilekshon MP Lok Sabha kan long ha ka Lah Sngi U Blei ha ki 49 tylli ki konstitwensi kiba don ha hynriew tylli ki jylla bad ar tylli ki Union Territory.
Ha kane ka jingïa-khun, ki kynrem ki lyndan kiba kham paw ki kynthup ïa u nongïalam ka seng Congress, u Ra-hul Gandhi na Rae Bareli bad u Myntri ka tnat ïada Ri, u Rajnath Singh na Lucknow. Kine baroh ar tylli ki konstitwensi ki don ha Uttar Pradesh.
Kitei ki 49 tylli ki konstitwensi ki kynthup ïa lai tylli ha Jharkhand, san ha Odisha, khatsaw ha Uttar Pradesh, san ha Bihar, khatlai ha Maharashtra, hynñiew ha West Bengal, kawei ha Ladakh bad kawei ha Jammu & Kashmir.
Haduh mynta, ïa ka jingthep ‘vote’ la dep pynlong ha ki saw bynta naduh ka 19 tarik Ïaïong kaba dei ka bynta ba nyngkong. Ka bynta ba ar ka la long ha ka 26 tarik Ïaïong katba kaba lai bad ba saw ka la long ha ka 7 bad 13 tarik Jymmang. Ha kine ki saw bynta, ka jingpoi ki nongthep ‘vote’ ka la long mar 66.1%, 66.7%, 61% bad 67.3%.
Ka bynta kaba hynriew kan long ha ka 25 tarik Jymmang katba ka bynta ba hynñiew bad kaba khatduh kan long ha ka 1 tarik Jylliew bad ka jingñiew ‘vote’ kan long ha ka 4 tarik Jylliew.
Ha kane ka ilekshon, ki seng kiba ïakhun ki long hapdeng arliang mamla, kata, ka National Democratic Alliance (NDA) ba la ïalam da ka Bharatiya Janata Party (BJP), bad ka Indian National Developmental Inclusive Alliance (INDIA) kaba don kumba 26 tylli ki seng saiñpyrthei ba kynthup ïa ka Congress.
