Shillong, Jymmang 19
U President ka Hynñiewtrep Youths’ Council (HYC), Bah Roykupar Synrem, u la ïathuh ba u Deputy Commissioner ka East Khasi Hills District u dang pynkhreh ïa ka kaiphot ba un phah sha u Defence Estate Officer (DEO) halor ka jingdon ki briew kiba shong be-aiñ ha Lum Survey kaba hap hapoh ka jingpeit jong ka Cantonment Board bad kaba don ha lyndet ka Ïew Mawlong.
U Bah Roykupar u la ïathuh ba mynta u Additional Deputy Commissioner uba la leit jurip lang bad ka seng HYC u dang pynkhreh ïa ka kaiphot ban phah sha u Deputy Commissioner ka East Khasi Hills bad hadien kata u DC un phah sha u DEO uba peit ïa katei ka jaka.
“Ngin ap shipor aïu u DEO un jubab ïa ka kaiphot ba la phah da u DC” la ong u Bah Roykupar
U Bah Roykupar u la ong ba ka seng kan sa shong pyrkhat biang lada u DEO u la jubab ïa ka kaiphot ba phah da u DC.
Kum ban shu pynkynmaw ka HYC, u ADC, ki ophisar ka Municipal bad Cantonment Board ki la leit jurip ïa ka jaka ha Lum Survey mynta artaïew duna bad lap kumba 80 tylli ki ïing kiba shong da ki poiwir.
Ha kane ka sngi ka shlem treikam DC ka la lum kyrteng ïa ki ïing bad kyrteng briew.
Ka jingleit jurip ka HYC ïa kiba sah ha Lum Survey ka dei namar ki tieng ïoh kane ka jaka ka kylla kum ka Them Metor kaba wanrah shibun ki jingeh khamtam ka jingjyllei ki kam sniew.
