Shillong, Jymmang 19
Ka Hynñiewtrep Integrated Territorial Organization (HITO) Student’s Wing ha ka Sngi U Blei ka la phah jingthoh sha u Myntri Rangbah ka Jylla, u Conrad K. Sangma ban dawa pyllait ïa ka eksamin Common University Entrance Test (CUET) na ka Jylla, ha kajuh ka por, ban weng ïa ka jingdonkam jong ka CUET na bynta ban ïoh rung klas ha ki shlem ai jinghikai hapoh ka Jylla. “Ka kynrum-kynram ba dang shen haba ïadei bad ka eksamin CUET ka la kdew shai ïa ka jingbym lah pynbiang jong ka Jylla ha ka ban pynkhreh na bynta ban pynlong ïa kum kine ki eksamin,” la ong ki nongïalam ka seng ha ka jingthoh ba la phah sha u Myntri Rangbah.
Haba pynsngew ba ka Jylla kam pat biang pura ban pynlong ïa ka eksamin CUET, ka seng ha kawei ka liang ka la ong ba kane ka buh jingeh kylla ïa ki samla pule, khamtam ïa kito na ki jaka nongkyndong kiba duna ha ka ïoh ka kot.
Ki nongïalam ki la ong ruh ba ka jingbym biang ha ka liang ki jingdon-jingem bad ki jaka thoh eksam ka la wanrah jingeh shi kat dei bad ban khia ïa ka ïoh ka kot jong kiba bun ki samla pule.
“Ngi ngeit ba kam ïahap satia ban pyntreikam jubor ïa ka mat treikam khlem ka jingpynkhreh kaba biang. Ki jingjia ba dang shen ki kdew shai ba ka Jylla kam pat long kaba la khreh ban pynlong ïa ka eksamin CUET. Hynrei wat la katta ruh, ka Sorkar ka la ïaid shakhmat bad ka eksamin, ha kawei ka liang kaba la pynkulmar jingmut ïa ki samla pule bad kaba la pynsep-ei ym tang ïa ka por hynrei ïa ka pisa kumjuh,” la ong ki nongïalam ka HITO.
Haba pynkynmaw ba hashuwa, ka seng ka la ïakren bad u Myntri barim ka tnad pule-puthi, u Bah Lahkmen Rymbui ban pyllait ïa ka eksamin CUET (uba la kular ïa kane), bad ba ki samla pule ka Jylla kin ym donkam ban pyni ïa ki ‘mark’ jong ka CUET na bynta ban ïoh rung klas, ka seng ka kyntu ïa ka Sorkar ban burom ïa ka kular ba ka la khlei.
“Ngim pyrshah ïa ka jingdonkam CUET na bynta ki samla pule kiba wad jingpule shabar ka Jylla. Hynrei ngi kyrpad jur ban pyllait ïa ka CUET na ki shlem pule kiba hapoh ka Jylla,” ki la ong.
Shuh shuh ka seng ka kyntu ïa ka Sorkar ban phah ïa ki jingpynbna sha ki skul bad kolej ha kylleng ka Jylla, ban pynshai ba ki samla pule kim donkam ban pyni ïa ki ‘mark’ CUET na bynta ban ïoh rung klas ha ki shlem ai jinghikai hapoh ka Jylla.
“Ka long kaba donkam ban pynshai ba tang ki samla pule kiba don jingthmu ban pule shabar Jylla ki donkam ban thoh ïa ka eksamin CUET,” la ong ka shithi na ka seng ba la phah sha u Myntri Rangbah.
