Shillong, Jymmang 19
Ka Thiar Lyngwiar Dpei Society Shillong (TLDSS) ha ryngkat ka jingïatreilang bad ka Khasi Department jong ka St. Anthony’s College ha ka Sngi Saitjaiñ ka la pynkup burom ïa ka Kong Silbi Passah kaba la ïoh ïa ka khusnam Padmashri, 2024 bad ha katei ka sngi la ïoh ruh ban pyllait ïa ka kot jong u Dr. Fr. Ïoannis War-Pakma kaba la ai kyrteng “The Paradigms of Conflict in the Works of H.W. Sten”.
Haba ai jingkren ha kane ka sngi, ka Kong Passah ka la pynpaw ïa ka jingsngewkmen kaba khraw ba ki nongpynïaid ïa katei ka prokram ki la ibit ïa ka ban ai ïa ka burom ha kane ka sngi.
Ka la ong ruh ba kane ka sngi ka la pynkynmaw ïa ki por kiba la leit noh kiba ka ju leit sha ka Kong Streamlet Dkhar haba ka ïakynduh ïa kino-kino ki jingeh ban ïoh jingshai kaba bha ha kiba bun ki liang bad ka Kong Streamlet da ka mynsiem kaba bha kam ju kyntait satia hynrei ka la ai jingmut ïa ka Kong Silbi ha ki kam kiba bun.
Na ka liang ka Kong Streamlet Dkhar haba kren ha kane ka sngi, ka la ong ba ka long ka jingkmen bad ka jingsngewsarong na bynta kine ki 2 ngut ki nongwanrah nam, kata u Dr. Fr. Ïoannis War Pakma bad ka Kong Silbi Passah kiba la wanrah ka nam bad ka burom ïa ka jaidbynriew baroh kawei.
Ka Kong Streamlet ka la ai ruh ka jingïaroh ïa ka Kong Silbi Passah kaba da ka jingtrei shitom jong ka, ka la lah ban wanrah ïa ka nam bad ka burom ïa ka Jylla bad ha kaba ïadei bad u Fr Ïoannis War Pakma, ka Kong Streamlet ka la ong ka jingwad bniah jong u halor ki jingthoh jong u H.W. Sten ka la wanrah ka jingmyntoi kaba khraw ïa shibun ki samla pule.
“Kane ka dei ka jingkmen bad ka jingsngew burom ïa baroh 2 ngut, kata ïa ka Kong Silbi Passah kaba la ïoh ïa ka khusnam ‘Padmashri’ na ka President jong ka Ri India bad kumjuh ïa u Fr. Ïoannis War Pakma uba la thoh bad pynmih ïa ka kot da ka jingwad bniah ïa ki jingthoh jong u Professor H.W. Sten,” la ong ka Kong Streamlet.
