Shillong, Jymmang 19
Ka jingtrei borbah ki pulit ka la pynlong ban ïoh kem ïa ki nongdie drok ha kylleng ki jaka, hynrei ban lap ïa ki snar nongkhaïi ka kham eh namar ki thaw bun ki buit kumno ban buhrieh ïa ka kyrteng lade.
Ha nongbah Shillong, ka jingjyllei ki nongdih drok ka la paw shynna ba kiba die ruh ki la jyllei namar wat ha ki district ki bym pat ju bna mynshwa, mynta ki la bun ki nongdie bad kiba la ngop ha u drok kaba buh jingma haduh katta-katta ïa ka imlang-sahlang.
Haba ïakren bad ki heh pulit kiba don ha katto-katne ki district, ki la ïathuh ba ki nongkhaïi drok ki thaw bun ki lad bad ki buit kumno ba kin lait ym tang shah kem hynrei ban thok ïa ka kyrteng lade.
“Ki nongkhaïi kiba kham heh ki thok ïa ka kyrteng jong ki ïa kito kiba wan thied drok na ki ban khaïi-pateng shawei bad kito kiba die drok sha kiba dih ruh ki thok ïa ka kyrteng jong ki khnang ba kin lah ban buhrieh ïalade ban nym don kiba tip ïa ki,” la pynpaw uwei na ki pulit ophisar.
La ïathuh ba kito kiba la kyrni ha u drok ruh haba ki shah bat ne shah kem, kim ju ïathuh ïa ka kyrteng bashisha jong ki briew kiba ju die ïa u drok sha ki, bad ki pulit ki hap ban pynkut ka jingtohkit ban lap ksai ïa ki briew kiba donkti ban khaïi ïa une u jingdih basniew.
Ki pulit ka Jylla ki la nang pynkut ka jingthwet ïa ki nongkhaïi drok bad la sakhi ba man ka por la ïoh bat ïa u drok bad kem ruh ïa ki briew kiba donkti.
Ka East Jaiñtia Hills bad kiwei ki district kiba don khappud bad ka Assam ki dei ki lynti ban pynïaid ïa u drok ba wanrah na kiwei pat ki Jylla bad ki ri na ka bynta ban pynpoi sha Meghalaya khamtam eh ha Shillong.
“Ngi la pyrshang katba lah ban khanglad ïa ka jingpynïaid ïew ïa une u jingdih basniew khamtam eh u drok uba la ktah bha ïa ka imlang ka sahlang jong ngi bad ngi donkam ban pyndkut ïa ki lynti jong ki nongkhaïi lyngba kiba bun ki lad khamtam ban ïoh kem ïa ki snar nongkhaïi,” la pynpaw u pulit ophisar.
Ha kine ki sngi, la sakhi ruh ïa ka jingïoh bat da ki seng bapher bapher ïa kiba dih drok bad kumjuh ruh kiba die da kaba pynap shrip bad leit khynra ha kylleng ki jaka. Na ka liang ki pulit ruh ki la bteng ban ïoh kurup ïa une u jingdih basniew khamtam ha khappud bad ka Assam kum ha East Jaiñtia Hills district bad Ri Bhoi district.
