Shillong, Jymmang 20
Ka Director General of Police (DGP) bathymmai ka Jylla ka Kong Idashisha Nongrang ka la ong ba ka jingïakren ïasuk bad ki seng lehnoh ka ju paw shai ba ka Sorkar ka long kaba kloi.
Ka DGP ka la pynpaw ïa kane haba kylli halor ka jingweng noh ka Hynñiew -trep National Liberation Council (HNLC) na ka jingïakren bad ka Sorkar.
“Ka jingïakren ïasuk, ka dei ka rai kaba la shim da ka sorkar bad kane ka la pynpaw shai kdar ba ka Sorkar ka long kaba kloi ban ïakren ïasuk. Ngi la ïohi ruh ïa ka jingïakren ïasuk bad ka ANVC kaba la kut noh da ka jingsoi soskular hapdeng ka sorkar pdeng, sorkar jylla bad ka ANVC bad ki jingeh ki lah ban mih haba pyntreikam ïa katei ka jingïateh kular.
Halor ka jingkynnoh sam shithi dawa pisa ka HNLC, ka Kong Nongrang ka la ong ba ka HNLC ka la dep pynshai ba kam dei satia ma ka, hynrei ka jingpynshisha ka dang ïaid shakhmat, la ki dei shisha ma ki ne kino-kino kiba mih na uno-uno uba kam ïalade kum ka HNLC.
“Ngi donkam ban btin biang ïa ki samla kiba la ïaid ha ka lynti kaba bakla, bad kam dei satia tang ka kamram jong ki pulit hynrei ka jingïatreilang bad ka imlang-sahlang bad kiwei kiwei ki kynhun kiba don ïa ka jingsngewkhia,” la ong ka DGP kaba la bynrap ba haba trei dei ban trei naduh ka mynsiem bad trei shitrhem.
