Jowai, Jymmang:
Ki bor pyniaid ka Meghalaya Bharat Scouts & Guides, West Jaiñtia Hills ha ka 16 bad 17 tarik Jymmang ki la pynlong ïa ka Rajya Puraskar Pre-Testing Camp ha District Headquarter, Jowai.
Ha kine ki 2 sngi, ki ‘Scout Master’ bad ki ‘Guide Captain’ na ki Unit bapher-bapher ki la wan ban ai ki jingbatai kumjuh ki jinghikai ïa ki khynnah ‘Scout-Guide’ shaphang ki bynta bapher jong ka ‘Scouts-Guides Movement’ ba kynthup naduh ka rukom teh tyllai (Knotting & Lashing), First-Aid, Compass-Mapping, Whistle Signal, B.P. Exercise, Camping-Hiking bad kiwei-kiwei ki bynta ba ïadei bad ka ‘Scouts-Guides Movement’.
U Adiam U Bthuh, District Secretary, u la ong ba ka jingpynlong ïa ka ‘Pre- Testing Camp’ ka long khnang ba ki khynnah kin lah ban pynjanai shuh-shuh ïa ka jingtip jong ki naduh ka rukom pynkhreh ïa ki ‘Log-Book’ ha kata ka rukom kaba itynnad bad ki ‘Practical’ kiba hap ban pyni hakhmat ki ‘Examiner’ ne ki ki ‘riew shemphang.
Shuh shuh u la ong, ki khynnah ‘Scouts-Guides’ kiba leh bha ha kane ka ‘Rajya Puraskar Testing Camp’ ka ban long ha State Headquarter, Shillong naduh ka 19 tarik haduh 25 tarik Jymmang, 2024 kin ïoh ruh ïa ka khusnam na u Lat ka Jylla kaba ju ai man u snem ha u bnai Risaw (October) bad ki khynnah ‘Scouts-Guides’ kiba ïoh ïa kane ka khusnam kin ïoh lad ruh ban ïashim bynta ne pynkhreh ban ïakhun ïa ka ‘Rashtrapati Award kaba dei ka Award kaba heh duh jong ki khynnah Scouts-Guides hapoh ka Ri India ka ban ai da u ne ka President jong ka Ri India.
Ha une u snem ki khynnah ‘Scouts-Guides’ kiba pynkhreh ban ïaleh ïa ka ‘Rajya Pursakar Award’ ki don kumba 24 ngut ki kynthei bad 12 ngut ki shynrang.
