Shillong, Jymmang 20
Ki dkhot ka Mawmluh Cherra Cement Employees Union (MCCEU) ha ka Lah Sngi U Blei ki la leit ban ïakynduh ïa u Myntri Rangbah ka Jylla, u Conrad K. Sangma ban pynkynmaw biang halor ki mat jingdawa kiba ka seng ka la buh hakhmat ka Sorkar.
“Ka jingwan ïakynduh jong ngi ïa u Myntri Rangbah ka long ban pynkynmaw halor ki mat jingdawa kiba ngi la aiti teng sha ka Sorkar,” la ong u General Secretary ka MCCEU, Bah Pynshai Lyngdoh haba kren sha ki lad pathai khubor.
U la ong ruh ba ka mat ka banyngkong kaba ki dkhot ki la ong ha u Myntri Rangbah ka long ba tad haduh ba ka karkhana kan da ïaid biang, ka Sorkar ka dei ban ai ïa ka jingïarap pisa sha ki nongtrei bad ym dei ban pynduh.
Haba pynpaw ka jingkyrmen ba ka karkhana kan sa ïaid biang, u la ong ba ka seng ka la pynsngew ïa kane sha u Myntri Rangbah halor ka VRS bad ka skhim ‘Golden Handshake’.
“Ngim pat ïoh kano-kano ka jingkular na ka liang u Myntri Rangbah namar ka jingtreikam jong ka MCC. Un sa khot biang ïa ngi ha kine ki taïew ki bnai ban wan,” la ong u Bah Lyngdoh.
Ha kajuh ka por, ka seng ka kyrpad ïa baroh kiba don ha ka liang ka Sorkar ban kyrshan ïa ki jingkdew jong ka seng namar kumba ka long, ka jingïarap jong ka Sorkar ka long kaba rit bad kum ki nongtrei ki mad jingeh shi kat dei ban pyntyllun ïa ka jingim jong ki.
“Ngi kyrpad ïa baroh kiba don ha ka liang ka Sorkar bad kiwei kumjuh ban kyrshan ïa ki jingkdew jong ngi naba dang bun ki para nongtrei kiba donkam jingïarap bad kiba la kut noh, hynrei namar ka jingbym biang ka jinglong-jingman jong ka kompeni ha ka liang ka pisa-tyngka, kim lah ban ïoh lut ïa ki hok baroh,” u la ong.
U la ïathuh ba ki don ruh ki para nongtrei kiba ïakynduh jingeh ha ki ïing ki sem jong ki, ha ka pang ka shitom bad kiwei ki liang bad kumta ki nongtrei ki donkam ka jingïarap kaba kham bun.
“Nga kyrmen ba ha kine ki taïew, ki bnai ban wan ba u Myntri Rangbah un khot bad ngin ïoh ïa ka jingseisoh,” la ong utei u nongïalam.
Ka seng ha kane ka sngi ka la ïoh ruh ban aiti ïa ka jingthoh sha u Myntri Rangbah ka Jylla.
