Jowai, Jymmang:
Ban ïarap ïa kito ki briew khamtam ïa ki nongpang kiba donkam snam, ka Kyrmen Foundation ha ka Sngi Thohdieng ka la pynlong da ka ‘Awareness Programme & Blood Donation Camp’ ha Kiang Nangbah Govt. College, Jowai.
Ha kane ka prokram ka Kyrmen Foundation halor ka jingnoh synñiang da ka snam, la ïatreilang ruh da ka Hawahoi Socio Development Society, ka Kiang Nangbah Government College Students’ Union bad ka Civil Blood Bank, Jowai.
Shuwa ban pynlong ïa ka jingnoh synñiang snam, la pynlong ruh ïa ka ‘Awareness Programme’ ne ka jingpynshai sha ki samla pule halor ka jingdonkam jong ka jingnoh synñiang ïa ka snam ha kine ki sngi.
U Deputy CEM ka JHADC, Bah Lasky Rymbai kum u kongsan, u la ban jur ba ka jingai sngewbha ïa ka snam ka long kaba donkam bha ban ïoh ïa ka met kaba koit ba khiah.
U la ïaroh ruh ïa ki khun samla kiba la mih shakhmat ban noh synñiang ïa ka snam kaba long ka jingpynim ïa kiwei pat kiba don hapdeng ka jingshitom bad jingduh jingkyrmen.
Ka Dr. P. Shylla, Senior Medical Officer In-charge Civil Blood Bank, Jowai, ka la pynshai ïa ki kyndon ai snam bad kyntu ruh ïa ki paidbah ba kim dei ban sheptieng ban synñiang ïa ka snam bad ha kajuh ka por ka la pynshlur ïa baroh ki nongai snam sngewbha ban ïai bteng ïa kane ka kam ba bha jong ki.
Kiwei kiba la ai jingkren ki long ka Dr. Easter Meena Blah, Principal ka Kiang Nangbah Govt. College, Jowai, Kong Simi Khongthiang, Secretary ka Kyrmen Foundation, Bah Fedrick Synnah na Hawahoi Socio Development Society, u Bah Evermore Rymbai, President KNGCSU, Kong Aitimary Mawlong bad kiwei ha ka jingïalang kaba la pynïaid da u Bah Achilles Rupert Pariat.
Ha katei ka sngi, napdeng ki 20 ngut ki samla, 15 ngut ki dei kiba biang ban synñiang ïa ka snam na ka bynta ka jingdonkam jong ki briew kiba donkam ha ka pang ka shitom.
