Shillong, Jymmang 20
Ka Sorkar Jylla lyngba ka tnat Social Welfare ha ka Lah Sngi U Blei ka la ai ïa ka jingkyrshan pisa kaba palat `15 lak sha ka Mawlai Town Dorbar (MTD) ban ïakhun pyrshah ïa ka jingkynrei jong u drok hapoh ka dong ka thaiñ.
“Ka jingkular jong ngi ka long ba khnang ban rat dyngkhong bad tehlakam ïa ka jingkynrei jong ka jingdie bad jingdih drok kaba la teh mraw khamtam ïa ki khun samla, ngi donkam ban ïalam nakhmat,” la ong u Myntri ka tnat Social Welfare, Bah Paul Lyngdoh.
Haba kdew ba ka Sorkar ka dei ka nonglam lynti, u la ong ba tang ka Sorkar marwei kan ym lah ban thaw pyrthei lane pynlong doh long snam ïa ki jingthmu, bad kumta donkam ïa ka jingïatreilang jong ka imlang-sahlang.
“Ka jingïakhun kan ym lah ban long tang nangne na Secretariat, ngi donkam khamtam ïa ka jingkyrshan jong baroh kiba nongshong shnong ba don ka jingsngewkhia lem bad ki Dorbar Shnong,” u la ong.
Haba pynsngew ba ka Sorkar ka da sngew burom shi kat dei ïa ka MTD, kaba long kawei na ki Dorbar kaba heh tam ha nongbah, u Myntri u la ong ba ka tnat ka la pynkhreh ïa ka jingpyllait pisa na bynta ka kylla ba 2, kaba long `15,65, 285 lak na bynta ban pyndep ïa ki kam ba sah ha ka ban wanrah ïa ka jaka sumar ne ‘Centre’ ka ban kitkhia ïa ki samla kiba la ngop ha ka jingkyrni ka jingdih drok.
“Kane ka dei ka thma kaba jar-jar hynrei kaba buh jingma ïa ka pateng khamtam jong ngi bad jong ka pateng ka ban wan. Lada ngi dei ban jop ïa kane, ngi donkam ïa phi ban ïa ïaid ryngkat,” la ong u Bah Lyngdoh.
Na ka liang u Secretary ka MTD, u Dr. Marco Mitri haba kren shaphang ka Centre, u la ong ba kane ka jaka kan ai jingsumar bad jingïarap ha ka liang ki dawai-dashin bad ki jingïasyllok ïa ki samla ka Mawlai kiba la wan da ka mon sngewbha da ka jingthmu ban ieh noh ïa ka jingkyrni jong ki.
“Hashuwa ki la don 19 ngut kiba la wan shakhmat ha Shillong Polytechnic bad hadien shi bnai, ka la kiew sha ka 42 ngut…mynta ka la ïaid kumba 3 bnai eiei. Ka por jong ka jingsumar kaba ngi la buh na bynta jong ki, ka long 4 bnai, hynrei ngi la pynjlan namar ki dang don kiba dang rung thymmai. Ngi ai khublei ïa u MDC uba la shah ban pyndonkam ïa ka ‘Make-Shift Camp’ jong u,” u la ong da kaba bynrap ba haduh mynta, ka jingsumar ka la don ha ka kylla kaba 2 kaba kynthup ïa ka jingïasyllok. U la ong ruh ba ka MTD ka la shim ïa katei ka sienjam da ka jingthmu ban pyni ba ka Dorbar kam mut ban shu long Dorbar tang ha ka nam naba ka pyrthei ka la kylla bad ki jingsniew-jingjyrsieh ki la rung lut ha ki shnong ki thaw.
“Ngi buh thong ban pynkut shi syndon ïa kane ka jingsniew kaba thmu ban pynjot bad bam duh ïa ka ri bad ka jaidbynriew,” u la ong.
Shuh shuh u Secretary u la bynrap, “Ngim kwah ban shu long tang ka ‘Make-Shift’ hynrei ban wanrah da ka Centre ka ban neh syndon. Ngi kyrpad ïa ki shnong hapoh Mawlai kiba don jaka ban ai jaka ha ka ban pynïeng ïa kane ka jaka sumar.”
