Shillong, Jymmang 20
Ka Hynñiewtrep Youths’ Council (HYC) ha ki sngi kiba la dep baroh ka la trei shitom borbah ban rat dyngkhong ïa u drok da kaba ka la leit ban khynra ha ki bynta bad ki jaka kiba don ka jingkhaïi bad ka jingdih drok kaba shyrkhei bha.
Ïa kane ka jingleit khynra, ka seng ka la pynlong ha ki distrik bapher-bapher jong ka jylla khamtam eh hapoh nongbah Shillong kaba la kylla kum kawei na ki ktem bah.
Ha kane ka jingleit khynra hapoh ki jaka bad ki shnong kiba la jur ka jingkyrni drok, ka seng ka la ïoh ban bat da ki phew ngut ki briew kiba dei ki nongdie bad nongpyndonkam ïa u drok ha ryngkat ka jingïoh kurup ïa u kynja, ka pisa bad ki tiar pynmynsaw na kitei ki briew.
Na ka liang ka seng ym tang ba ka lah pynlong ka jingkhynra bad ka jingbat ïa kitei ki khynnah kiba la ngop ha u drok hynrei ka seng ka kwah ruh ba kitei ki khynnah kiba la ngop bad shah teh ha une u jingdih pynbuaid kin lait shi syndon na kane jingshah teh mraw.
Kumta ka seng ha ryngkat ka jingïatreilang bad ki bahaïing hasem jong ar ngut ki khynnah kiba la shah bat ha kawei na ka jingleit khynra drok jong ka seng ha ka 17 tarik u Jymmang 2024 ha ka Ïew Jhalupara, ki la leit ban buh ïa kitei ar ngut ki samla kiba dang don hapoh ka 25 snem ka rta ha kawei ka ‘Rehabilation Centre’ ne ka jaka ai jingsumar na ka bynta kito ki briew kiba la ngop ha ki jingdih pynbuaid ïa kaba la tip kum ka Alive Again Foundation Rehabilitation Centre kaba la long trai da u Bah Rup Passah kaba don ha Guwahati Assam ha ka 19 tarik u Jymmang 2024.
Na ka liang u Vice President ka HYC, u Bah Donboklang Kharlyngdoh u la ong ba ka seng ka la ïakhun pyrshah ïa u drok namar ka la ïohi ïa ki kam sniew kiba la jyllei shikatdei eh bad haba ka ïakhun pyrshah ïa u drok ka mut ba kum ka seng ka isih ïa u drok ym ïa ki nongdih.
“Ym tang ba ngin ïakhun ïa u drok bad ban rat dyngkhong ïa ki jingsniew hynrei ban pynbha pat ïa kito kiba la ngop ha u drok”, la ong u Bah Donboklang.
U Bah Donboklang u la ong ba ka seng ka kyrmen skhem ba kine ki arngut ki samla kiba don ka jingthrang ban kylla bad im noh ka jingim kaba bha kan long ka jingkmen kaba khraw ïa ka ïing ka sem jong ki baroh arngut.
Shuh shuh u Bah Donboklang u la ong ba kane ka jaka ai jingsumar jong u Bah Rup Passah ka dei kaba la paw bha hynrei na ka liang ka sorkar jylla Meghalaya kam pat ithuh satia ïa kane ka jaka ai jingsumar wat haduh kine ki sngi.
U Bah Donboklang u la ong ba ka jingïakhun jong ka seng ïa u drok nangne shakhmat kan dang ïaid shaid-shaid, bad ka seng ka la kyntu ruh ïa ki longkmie-longkpa kiba don ka jingsngewkhia ïa ki khun ki kti ba lada ki kwah ban ïakynduh ïa ka seng, ka seng ka long kaba la kloi ban ïakynduh ïa ki.
U Bah Donboklang u la ther ruh ïa ka sorkar kaba kloi ban pynlut pisa ha ki tamasa bapher-bapher hynrei ha kaba ïadei bad ka jingïakren ban pynbha bad thaw thymmai ïa ka lawei jong kito kiba la ngop ha ki jingdih kiba sniew, ka la ai pynban da ki daw kiba laiphew jait.
“Ngi kyntu ïa ka sorkar ba kan shimkhia ïa kum kine ki mat, kumba ka la lah ban shimkhia ïa kiwei pat ki mat, sngewbha shim khia lem namar kane ka dei ka kam ïap-kam im ïa kaba phi kiba shong ha ka bor, lada phi shim ïa kane kum ka kamkai lehse, ngim lah ban tip ba kum kane ka jingjia jingpang ka lah ban wan sa ha ïing jong phi ne jong nga lashai-lashisngi”, la ong u Bah Donboklang.
