Nongpoh, Jymmang 20
Ha kawei ka jingjia ïatyngkhuh kali kaba la jia ha ka step Lah Sngi U Blei, uwei u samla u la duh noh ïa la ka jingim hadien ba ka kali kaba u ñiah ka la ïatyngkhuh mar khmat bad kawei ka trok kit dewbilat kaba dang wan na Lumshnong, East Jaiñtia Hills District.
Katkum ka tyllong khubor kaba la ïoh la ong ba kane ka jingjia ka la jia ha surok ha Umroi Nongrah, Ri Bhoi District, ha ka por kumba 1:50 baje eiei step synñia.
La ong ba kane ka trok kit dewbilat kaba don ïa u registration number AS01-RC-3530 ka dei kaba dang thmu ban hiar sha Guwahati bad kaba la ñiah da u Bah Teining Parien na ka shnong Mootyrshiah, West Jaiñtia Hills. Hynrei, ynda la poi ha Umroi Nongrah jong ka surok Shillong By-pass, ka la ïatyngkhuh mar khmat bad kawei ka kali Alto K10 kaba dang wan na ka liang pyrshah.
Ha kane ka jingjia, u nongñiah jong ka kali Alto K10 kaba don ïa u nombor ML05-S-5217 ïa uba la tip kyrteng kum u Donald P Syiemlieh na ka shnong Demseiñiong, Smit, East Khasi Hills District u la duh noh ïa la ka jingim na ka daw jong ka jingmynsaw jur.
