Shillong, Jymmang 20
Ka ophisar Indian Police Service (IPS) kaba kham hashwa bad kham rim tam ka Kong Idashisha Nongrang ka la shimti kum ka Director General of Police (DGP) bathymmai ka jylla ha ka Lah Sngi U Blei ha kaba ka buh ruh katto-katne tylli ki mat kiba kham hakhmat kiba ka tnat pulit kan leh kynthup ka jingpynneh ïa ka suk ka saiñ.
Ka Kong Nongrang kaba mih bujli ha jaka u DGP barim u Dr. L.R Bishnoi, ka dei ka ophisar IPS jong u snem 1992 ka Assam-Meghalaya cadre, ka la shakri baroh shikatta kum ka Director General ka tnat Civil Defence & Home Guards ka Jylla bad kham mynshwa ka la don ruh bad ka Sorkar Pdeng hapoh ka tnat MHA.
Haba ïakren bad ki nongthoh khubor ha ka Lah Sngi U Blei hadien ba ka la shimti kum ka DGP, ka Kong Nongrang ka la sngewkhia ïa ka jinglong-jingman ha Jylla khamtam ka jingkiew ki kam runar bad banjur ban pynneh ïa ka shongsuk-shongsaiñ kynthup ban ïakhun ïa ki jingshah thombor kum ki mat kiba hakhmat eh.
Haba kren shaphang ka jingïoh ïa ka kum ka ophisar IPS kynthei kaba nyngkong eh ha Jylla ban poi sha ka kyrdan DGP, ka Kong Nongrang ka la ong, “Kum ka ophisar kynthei bad ka longkmie, nga sngew khaiñ bha ba ki kynthei ki don la ka jong ka bynta. Ka jinglong DGP ka kynthei kam dei ka jingdon kyndon ban long kum ka DGP, hynrei ngan pyndonkam ïa ka bynta ban pynthikna ba ki kynthei kin sngewtynnad bad kin sngew shngaiñ bad jingsuk ha ka leit ka wan. “
Nalor nangta, ka la ong ban pynbha shuh shuh ïa ka jingtreikam ki pulit, kaba donkam ka long ka jingsuk ban ïajan hapdeng ki pulit bad ki paidbah.
