Tehran, Jymmang 20 (UNI)
Ïa ka met kaba sah jong u President ka Ri Iran, u Ebrahim Raisi, u Myntri ka tnat bar ri jong ka Iran, u Hossein Amir-Abdollahian ryngkat bad kiwei pat la lap noh ha ka Lah Sngi U Blei hadien ka jingwad kaba la neh bun kynta kaba la sdang ha ka Sngi U Blei.
Nalor jong u President Raisi bad u Myntri ka tnat bar ri, kiwei pat kiba la khlad ki long u nongïalam jingduwai ha Tabriz, u Mohammad Ali Al-e-Hashem, u Lat ka East Azerbaijan, u Malek Rahmati, bad ki nongpahara u President lem bad ki briew kiba pynïaid ïa ka ‘Helicopter’.
Lah ban kdew ba ka ‘Helicopter’ kaba la kit ïa u President ka Iran bad kiwei ka dang wanphai na ka thaiñ Khoda Afarin kaba don ha East Azerbaijan Province hadien ba u President u la leit plie ïa ka Dam kaba don ha khappud jong ka Iran bad Azerbaijan. Hynrei kane ka ‘Helicopter’ ka la hap ha ki jaka lum hapdeng ka jingsniew jong ka suiñ bneng.
Na ka liang u nongïalam ka Iran, u Ayatollah Seyyed Ali Khamenei, u la pynbna ba kan don ka jingïam briew kaba san sngi lynter ha Iran, bad u la ai jingmynjur ruh ban thung ïa u Vice-President Mohammad Mokhber ba un long u President ba shipor jong ka Iran.
Ïa ka met kaba sah jong u President Raisi bad kiwei ba la ïoh na ka jaka ba hap ka ‘Helicopter’ la rah noh sha Tabriz.
U khlieh duh jong ka Iranian Red Crescent Society (IRCS), u Pir-Hossein Koulivand, u la ong ba ïa ka met kaba sah jong baroh kiba la don ha katei ka ‘Helicopter’ la kit noh da ki ‘Ambulance’ sha Tabriz. U la ong ba la pyndonkam ïa ki kynhun bapher-bapher ban wad ïa ka jaka ba hap ka ‘Helicopter’ hadien ba kawei ka ‘Drone’ ka la lah ban pynithuh shai haei kata ka jaka ka don. Ka jingwad ka la ïaid naduh hynnin ka sngi hapdeng ka jingkah u lyoh bad jinghap slap.
Shuh shuh la ong ba katei ka ‘Helicopter’ ka la hap hajan kawei ka par ba tih tama (Copper) ba la tip kum ka Sungun, bad kane ka don hapdeng ka Jolfa bad ka Varzaqan ha ka East Azerbaijan Province jong ka Iran. Ka don kumba 100 km eiei na ka nongbah Tabriz kaba long kawei na ki nongbah ba heh duh ha Iran. Ha ka jingshisha, u President bad kiwei ki la thmu ban leit sha kane ka nongbah hadien ka jingïalang ban plie ïa ka Dam.
Naduh ka por mynsngi jong ka Sngi U Blei, la pyndonkam ïa 40 tylli ki kynhun ban wad ïa ka ‘Helicopter’ kaba la jah bad la lap pat ha ka step jong ka Lah Sngi U Blei.
U Ebrahim Raisi, 63, u dei na ka nongbah Mashhad. U la shah jied kum u President ha u snem 2021, bad hashwa jong kata, u la long u heh duh jong ka tnat bishar, ‘General Prosecutor’ bad Vice Chairman ka ‘Assembly of Experts’. U la long ruh u dkhot ka ‘Expediency Council’.
Na ka liang ki nongïalam na ki Ri bapher-bapher ki la pynpaw ïa ka jingsngewkyndit bad ka jingsngewsih halor ka jingkhlad noh jong u President bad u Myntri ka tnat bar ri ka Iran lem bad kiwei pat ha katei ka jinghap ka ‘Helicopter’.
Ka Sorkar India mynta ka sngi ka la pynbna ba lashai ka sngi kan dei ka sngi ban pynpaw ïa ka jingsngewlem ha ka Ri baroh kawei halor ka jingkhlad noh jong u President ka Iran bad kiwei. Lashai ka sngi, ïa ka Lama Lai Rong jong ka Ri yn pynher tang shiteng, bad yn ym don kano-kano ka prokram lehkmen jong ka sorkar.
