Shillong, Jymmang 20
Ka Hynñiewtrep Youths’ Council (HYC) ha kine ki sngi bad taïew ka la pynjur shi kat dei ïa ka jingïakhun thma pyrshah ïa u drok da kaba hiar ban khynra ha ki jaka bad ki thaiñ bapher-bapher bad kumjuh ban ïoh bat ïa kito kiba donkti ha kine ki kam be-aiñ.
Ha kane ka jingïa-khun, la ïoh ban sakhi ba ka HYC ym tang ba ka la hiar ban khynra ïa ka jingjyllei jong u drok ha ki bynta bapher-bapher jong ka rilum Khasi bad ban bat ïa kiba donkti, hynrei ka la mih shakhmat ruh ban ïarap ban ai ka jingsyllok bad pynïoh ka jingsumar ïa kiba la kyrni ha ka kam dih drok.
Kumta ka seng ha kane ka jingïakhun bad ban ïarap ïa ki khun samla kiba la ngop ha ka jingkyrni dih drok, ha ryngkat ka jingïatreilang bad ki bahaïing hasem jong kito kiba la ngop ha kine ki jingdih ba sniew, ka la ïoh ban ïa syllok bad ïalam ïa 2 ngut ki samla sha ka jaka sumar kaba don hajan Guwahati, Assam ha ka 19 tarik mynta u bnai.
Ïa kine ki samla la ïalam da ki bahaïing hasem ryngkat ka jingsynran lang ki nongïalam ka HYC kiba la leit hi shaduh ka jaka ai jingsumar sha Guwahati namar ki la ngop ha ka jingkyrni dih drok.
Ïa ka kynhun jong ka seng la lamkhmat da u samla Donboklang Kharlyngdoh, Vice President, CEC ha ka jingdon lang kiwei ki nongïalam ba kynthup ïa u samla Francis G Mawlong, Vice President, samla Isaac Basaiawmoit, Secretary, samla John Lyngdoh, Chief Organising Secretary bad kiwei ki dkhot ka CEC.
Shuh shuh na ka liang jong ka seng ka la ong ba nalor ki jingkhynra kan pyrshang ruh ban ïakren ïasyllok bad kiba kum kine ki khun samla ha ryngkat ki bahaïng hasem ba kin wad lad wad lynti ban buh ïa ki ha ki jaka sumar. Nalor nangta, u la ong na ka liang ka seng kan ïarap ruh kat i bor ba lah na bynta ban ïa thaw lad ba ki khun samla ka jaidbynriew kin ïoh ïa ki lad sumar bad kin lait na kane ka jingpang kyrni drok.
