Shillong, Jymmang 20
Ka Executive Committee jong ka Khasi Hills Autonomous District Council (KHADC) ka la pynmih ïa ka jingpynbna paidbah ha kaba la kyrpad ïa ki Rangbah Shnong, Rangbah Kur bad ki Kur bapher-bapher kiba hap hapoh ka jingpeit jong ka Council ba kin pyntip lyngba ka jingthoh ïa ki kyrteng jong ki Seng Kur ryngkat ka jaka treikam sha u Secretary/Deputy Secretary uba peit ïa ka Lineage KHADC.
Kane ka jingpynmih ka Executive Committee ka KHADC ïa ka jingpynbna ha ka Lah Sngi U Blei ka la wan tang khyndiat sngi hadien ba ka KHADC ka la rai pynmih noh da ka thup jong ki kur ki jait Khasi kiba don hapoh u pud u sam jong 5 tylli ki District ka Ri-lum Khasi kiba hap hapoh ka jingpeit jingkhmih jong ka Council.
U Deputy Chief Executive Member (Dy CEM) ka KHADC u Bah Pynshngaiñlang N Syiem dang shen u la ïathuh ba ka KHADC ka la shim rai ha ka jingïalang hapdeng ka KHADC bad ki nongmihkhmat jong ki kur bapher-bapher bad ki Khlieh Nongsynshar namarba ka mih ka jingïatai halor ka mat ban ithuh Scheduled Tribe bad kumno ban tehsong ïa ki Seng Kur.
U la ong ba ka thong jong kane ka long ban pynbeit ryntih ruh ïa ka rukom pynïaid kam ki Kur ki Jait (Clan Administration) hapoh ka Ri-lum Khasi-Jaiñtia.
Ka jingïalang ka la ïatai ruh ha kaba ïadei bad ka jingbatai mano ba dei u Khasi, da kaba pynshong nongrim katkum ka KHAD (Khasi Social Custom of Lineage) Act, 1997.
