Shillong, Jymmang 20
Ka shlem treikam Direc-tor of Health Services (MI), Shillong, Meghalaya ka la pynsangeh noh shuwa ïa ka ‘Walk-In-Interview’ haba ïadei bad ka kam ‘Staff Nurse’ ka ban long ha ka 22, 23 bad 24 tarik mynta u bnai ha Shillong bad Tura.
“Kane ka long ka jingpyntip sha baroh ba ka ‘Walk-In-Interview’ kaba la pynbeit ban long ha ka 22, 23 bad 24 tarik mynta u bnai ha Shillong Centre bad 22, 23 bad 24 tarik mynta u bnai ha Tura Centre kumba la pynmih lyngba ka jingpynbna na ka Directorate No.HSM/ NS/18/2023/6287, Dated Shillong, 15/5/24 la pynsangeh noh shuwa tad ynda pynbna da kum-wei pat,” la ong ka kyrwoh jingpynbna na ka ophis.
Kum ban shu kdew hangne, ka Khasi Students’ Union (KSU) lyngba ka Employment Monitoring Cell ka la kyntu ïa ki bor ba dei khmih ka koit ka khiah ban pynbna paidbah ïa ki ‘mark’ jong baroh ki kyrtong kiba la thep ïa ka kam ‘Staff Nurse’ khnang ba ka jingjied ïa ki kyrtong na bynta ka ‘Interview’ kan long kaba khuid ba suba.
Ka seng dang shen ha ka shithi ba la phah sha ka shlem treikam Director/ Addl. Director, Director of Health Services ka Sorkar Jylla ka la pynpaw ka jingsngewkhia halor ki jingkynnoh bapher-bapher na ka liang ki kyrtong kiba la thep ïa ka kam ‘Staff Nurse’ katkum ka jingpynbna ha ka 06.03.2024 – No. HSM/NS/18/2023/79315 ba la pynmih da ka shlem treikam Director of Health Service, Shillong, Meghalaya.
Ka seng ka la ong ba katkum katei ka jingpynbna, ka ophis ka la pynmih ïa ki jingkdew ban jied ïa ki kyrtong na bynta ka ‘Interview’ katkum ka jingwan shakhmat jong ki ne ‘merit’, hynrei kumba ka long, ki don bun tylli ki jingkynnoh na ka liang ki kyrtong (ki bym don ha ka thup kyrteng na bynta ka ‘Interview’) ba ka thup kyrteng ka long kaba thok bad kaba lah ban pynkhreh da ka jingtuklar jong ki briew kiba don ha ka bor – kiba don ha ki kyrdan bapher-bapher hapoh ka Sorkar bad ophis kumjuh.
Ka la ong ba ki don bun bah ki jingkynnoh ba ki kyrtong kiba la shah jied na bynta ka ‘Interview’ kim shym la lah ban kot ïa ki jingbuh kyndon na ka liang ka ophis, katba ki kyrtong ki bym shah jied ki don lut ïa baroh ki jingdonkam kiba ka ophis ka pan.
Ka seng kumta ka kyntu ba khnang ban don ka jingkhuid bad jingshai ha ka thup kyrteng ki kyrtong kiba shah jied na bynta ka ‘Interview’ bad ban kiar na kino-kino ki jingkam jong ka jingshah liang ba dei bahaïing, dei ban pynmih ïa ki ‘mark’ jong baroh ki kyrtong kiba la thep ïa ka kam khnang ban pynshai ïa baroh ki jingartatien halor ka rukom thung kam kumjuh ban kiar na kino-kino ki jingbym biang haba ïadei bad ka jingjied ïa ki kyrtong.
Shuh shuh ka seng ka kyntu ba ïa ki ‘mark’ ba la ïoh pdiang da ki kyrtong dei ban pynbna paidbah ha shuwa ban sdang ka ‘Walk-in-Interview’.
