Shillong, Jymmang 20
Ki nongïalam bad dkhot ka Hynñiewtrep Youths’ Council (HYC) ha ka janmiet Lah Sngi U Blei ki la tur sha thanat Sadar hadien ka jingshah rah jong uwei u dkhot ka seng ha ki CRPF katba dang khynra drok ha ki thaiñ Khyndai Lad.
Ha ka janmiet jong ka Lah Sngi U Blei ki dkhot ka HYC ki la bteng biang ïa ka jingleit khynra ïa ki nongdih bad nongdie drok ha ki thaiñ Khyndai Lad. Ha ka por ba ki dang mareh ban beh ïa ki khynnah dih drok, uwei na ki dkhot u la shah bat ha ki CRPF bad shah patan sha thanat Sadar.
Na ka liang jong ki nongïalam bad ki dkhot haba ki la ïohi halor kane, ki la hiar sha thanat Sadar ban leit ïakren bad ki pulit kane ka thanat ba balei la rah bad patan ïa u dkhot jong ki sha thanat.
La ïoh ban sakhi ba ha ka por ba dang ïakren hapoh thanat, ki pulit ki la khang kdam ïa ka khyrdop kum shi bynta ban khang pyrshah ïa kiwei pat ki dkhot ban rung sha thanat. Kumba hadien katto-katne por ka jingïakren la pyllait noh ïa une u dkhot uba la synran lang da ki nongïalam ryngkat ka jingpyrta ‘Tur Shaphrang Khlur ka Ri’.
