Nongpoh, Jymmang 20
Ki runar bym lah satia ban ithuh ki la leit ban prong tuh ïa ka jaka buh pisa jong ka State Bank of India (SBI) kaba don ha ICAR, Umïam da kaba pynpait ïa ka jingkhang ïit bad ka jingker nar kaba don sha ki bynta ba shadien jong katei ka bank ban ïoh rung shapoh.
Ïa kane ka jingjia la lap ha ka step jong ka Lah Sngi U Blei da ki nongtrei jong katei ka bank kiba la ïohi ïa ka jingshah pynpra jong ka jingkhang ïit bad jingker nar.
La ïathuh ba kitei ki runar kiba la ïoh ban rung shapoh ka bank, ki la hap ban phet bad mih thylli noh napoh katei ka bank namar ka jingbym lah ban pynpait ïa ka jaka buh pisa kaba don ha katei ka bank.
La ong ba ki runar hadien ba ki la ïoh rung shapoh ki la pyrshang ban pynpait ïa ka jaka buh pisa da kaba tih ïa ka kynroh, hynrei namar ka jingskhem jong katei ka jaka buh pisa kaba da ki nar, ki nongtuh kim shym la lah satia ban pynpait kumba ki thmu.
Na ka liang jong ki nongtrei ka bank, ki la pyntip noh ïa kane ka jingjia sha ki pulit ka thanat Umïam na ka bynta ban pynlong ïa ka jingtohkit ban lapdien ïa ki runar kiba donkti. Ki pulit ka thanat Umïam kiba la wan poi ha katei ka jaka, ki la pyntip noh ïa kane ka jingjia sha ka tnat Crime Branch ban pynlong ïa ka jingtohkit kaba bniah.
