Shillong, Jymmang 21
U Myntri barim ka Sorkar Jylla uba dei u MLA ka BJP na South Shillong konstitwensi u Bah Sanbor Shullai u la kam ba kumba 30% ki nongthep ‘vote’ ka South Shillong konstitwensi ki khlem leit thep ‘vote’ namar ki dom bym don u ‘Lotus’ ha ka kor thep vote (EVM). U Lotus u dei ka shap jong ka BJP.
Haba ki nongthoh khubor ki buh jingkylli halor ka jingduna kiba leit thep ‘vot’e ha South Shillong konstitwensi ha kane ka ilekshon MP na Shillong Parliamentary konstitwensi, u Bah Sanbor u la ong ba ma u dalade u la lap ba ki paidbah hapoh ka konstitwensi jong u ki khlem leit thep ‘vote’ shuh wat kito kiba la ïeng laiñ ha ki jaka thep ‘vote’ ki kylli na ki nongpynïaid ilekshon la ka don ne em ka kyrteng u Bah Sanbor bad ka don ne em ka shap ‘Lotus’ jong ka BJP.
Hynrei u la ong ba namar ka jingbym don u Lotus, ki paidbah ki dom bad ki khlem thep ‘vote’ shuh ha South Shillong bad u la bynrap da kaba u la ong ruh ba u don ki sakhi ban kyrshan ïa ka jingkam ka jong u.
U Bah Sanbor u kubur ba ka BJP na Delhi ka la pynkohnguh ïa ka BJP Meghalaya ban nym buh kyrtong hynrei ban kyrshan beit ïa ka NPP ha kane ka ilekshon MP wat lada ka BJP ka la dep pynkhreh kham mynshwa ban buh kyrtong na Shillong bad Tura.
U la ong ruh ba ka BJP ka ai ka jingkyrshan ïa ki kyrtong ka NPP ha Meghalaya kumba la bthah da ki nongïalam jong ka seng namar kawei ruh ka NPP ka dei kaba don lang hapoh ka NDA. Ka South Shillong ka dei kawei na ki konstitwensi kiba duna bha kiba leit thep ‘vote’ ha ka 19 tarik Ïaïong, 2024.
U Bah Sanbor u la ong ba wat hapdeng ki jingbatai ban pynsngewthuh bakla ïa ki paidbah da kaba thaw ktien ba ka NPP ka dei lang ka BJP. U la ong ba ka don ka jingpynsngewthuh bakla kum ka jingpyntieng ban khang ïa ki Ïingmane lada jop ka NPP bad BJP na Meghalaya bad kane ka treikam khamtam ha ki shnong nongkyndong.
U Bah Sanbor u la ong ba u kyrmen ba ka NPP kan jop ha kane ka ilekshon MP na ka bynta ka jingmyntoi ka Jylla.
U la ong ba lada jop ka Liang Pyrshah kan long ka jinglehnohei namar ka Congress ruh kam lah ban leh ei ei bad lada jop lei lei ka VPP, kan long ka jingduh ïa ka Jylla.
