Nongpoh, Jymmang 21
Ka Dorbar Pyllun jong ka shnong Erpakon ka la shim ïa ka rai ban beh noh ïa baroh ki bar jylla, la ki dei kiba la dep ban seng kam seng jam ne kito kiba shong wai hapoh u pud u sam jong ka shnong.
Ïa kane ka rai la shim ha ka jingïalang jong ka Dorbar Pyllun (General Body) ka shnong Erpakon kaba la ïakynduh ha ka Sngi Ba-ar, ha kaba da kawei ka sur kaba tyngeh la rai ban beh lut ïa baroh ki bar jylla kiba wan seng kam seng jam, kiba shong wai bad kiba sah be-aiñ hapoh ka shnong.
Kane ka rai ka la wan ruh hadien ba ka la don ka jingshah pynïap dusmon jong uwei u rangbah na ka shnong ha u bar jylla, uba trei bylla ha ka dukan bam RN Sharma Hotel kaba don hapoh u pud u sam jong ka shnong.
Kum ban shu pynkynmaw biang, u Bah Kyrmen Lyngdoh Nonglait (ba la khlad) 38 snem bad uba dei u nongshong shnong ka Erpakon u la shah tied da ka kynja lyntang na ki bynta jong ka khlieh haduh ba un da khlad syndon ha ka 11 tarik u Jymmang 2024 ha ka por kumba 7:30 baje janmiet, bad ïa ka met ka jong u kaba la thiah lyngktar ryngkat ka jinglyngkien ka snam hapoh ka surok shnong, la lap da ki briew shnong ha ka por kumba 8 baje eiei ha katei ka juh ka miet.
Hadien ka jingujor ejahar na ka lok jong utei u rangbah, ka Kong Kismilin Snaitang, ki pulit ka thanat Nongpoh ki la ïoh ban kem noh ïa uwei u bar jylla uba la tip kyrteng kum u Raju Rajbhar (42 snem) uba dei u nongtrei jong ka dukan bam RN Sharma Hotel. Ha ka jingtohkit ki pulit, u Raju Rajbhar u la phla ba u la shoh ïa u Bah Kyrmen Lyngdoh Nonglait da ka kynja lyntang hadien ka jingkynad na ka jingshoh khawiang.
Ka jingshim jong ka bor ba ha khlieh ka Dorbar Pyllun jong ka Dorbar Shnong Erpakon ïa kane ka sienjam kaba tyngeh ka long ruh ban pynpaw ïa ka jingbitar jur halor katei ka jingshah dkhat jubor noh ïa ka jingim jong utei u rangbah na ka shnong ha utei u bar jylla kaba la wanrah ïa ka jingbym shngaiñ bad ka jingtieng jingsmiej ïa ki paid nongshong shnong. Lyngba kane ka sienjam, ki nongïalam shnong ki don ka jingkyrmen ban wanrah biang ïa ka jingshngaiñ bad ka shongsuk shongsaiñ hapoh ka shnong ka thaw.
Ha kajuh ka por ka Dorbar Pyllun jong ka Dorbar Shnong Erpakon hapoh ka jingïalam u Bah M Thongni, Rangbah Shnong bad u Bah Lambor Kharshilot, General Secretary, ka la rai ruh ba baroh ki nongtrei bar jylla kiba trei bylla ha ka dukan bam RN Sharma Hotel bad kiba wan shong wai ki bym shym la noh synñiang eiei ruh em sha ka shnong ba ki dei ban mih noh napoh ka shnong hapoh shi bnai bad ba u trai katei ka dukan bam, kata u RN Sharma ruh u hap ban pyllait noh ïa kane ka dukan ban ailad pat ïa ki trai ri trai muluk ba kin pynïaid bad seng kam seng jam ha katei ka dukan kaba don ha poh u pud u sam jong ka shnong Erpakon.
Shuh shuh, nangne shakhmat, ka bor ba ha khlieh duh, kata ka Dorbar Pyllun jong ka shnong Erpakon kaba la ïashim bynta lang da baroh ki paid nongshong shnong ba kynthup naduh ki samla kynthei, shynrang, longkmie, longkpa bad ki tymmen ki san, ka la shim syndon ïa ka rai kaba tyngeh ba nangne shakhmat kan nym ai jingbit (no objection certificate) shuh sha ki bar jylla ban seng kam seng jam (business) hapoh shnong Erpakon.
