![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Jymmang 21
Hadien ba la shimti kum ka khlieh duh jong ka tnat pulit ka Jylla, ka Director General of Police (DGP) ka Kong Idashisha Nongrang kan ïakynduh ïa baroh ki pulit ophisar kynthup ïa ki Superintendent of Police (SP) na kylleng ki district na ka bynta ban ïatai bad ai jingmut lang halor kiba bun ki mat bad ki jingeh kiba ka tnat ka ïakynduh ha ka rukom ai jingshakri bad ban pynkhlaiñ ïa ka tnat ha ka rukom treikam.
Ka Kong Nongrang ka la shimti kum ka DGP ha ka Lah Sngi U Blei hadien ba ka la shah thung ha kane ka kyrdan namar ka samoi treikam u Dr. LR Bishnoi ka la poi sha kaba kut kum u DGP ka Jylla.
La ong ba kum ka rukom, ka DGP kum ka khlieh duh jong ka tnat pulit kan lum ïa ka jingïalang bad dei ha kane ka jingïalang ba kin mih ki jingïakren bad jingai jingmut lang kumno ban nang pynkhlaiñ ïa ka kynhun kaba trei ban ai jingïada ïa ki paid nongshong kum ka tnat kaba peitngor ban tehlakam bad khanglad ïa kino-kino ki kam bymman bad jingleh kiba long pyrshah ïa ka aiñ.
“Ngim artatien ba hapoh ka jingïalam jong ka DGP kaba thymmai kaba la don slem ha ka kam bad kaba la shakri bun snem hapoh ka Jylla bad ha ki tnat treikam ka Sorkar Pdeng kan long ka jingïarap ha ka jingtreikam bad ban ai jingshakri ïa ki paidbah,” la pynpaw kiba bun ki pulit ophisar.
Ka Kong Nongrang kaba dei ka ophisar IPS jong u snem 1992, ka dei ruh ka ophisar IPS kynthei kaba nyngkong na kane ka Jylla ban poi sha ka kyrdan DGP.