Shillong, Jymmang 21
U Vice-President ka United Democratic Party (UDP), Bah Allantry Dkhar ha ka Sngi Ba-ar u la ong ba ka ilekshon MP kaba dang shu dep ka long kaba kham pher bad ka jingjop ha ka 4 tarik u Jylliew ka lah ban dei jongno-re-jongno.
“Kito kiba la kyrmen skhem ban poi sha ka thong ki la lum jingkheiñ. Katkum ka jingsngewthuh jong nga, ka lah ban dei ka jingjop jongno-re-jongno ha ka 4 tarik u Jylliew,” la ong u Bah Dkhar haba kren sha ki lad pathai khubor.
Haba kdew ba ka ilekshon MP ba dang shu dep ka long kaba kham pher haba ïanujor bad kiwei pat, u la ong ba ki la don shibun kiei-kiei ha kane ka ilekshon khamtam ha ka por ba treikam ka jingjar-jar ha shuwa ban thep ‘vote’ bad kumta u la ban biang ba ka jingjop ka lah ban dei jongno-re-jongno.
Haba kylli, utei u nongïalam u la ong, “Ngi khmih lynti ïa kata, hynrei ka ilekshon ka dei ka ilekshon bad ngim dei ban klet ïa kane. Hooid, ka jingkyrmen jong ngi ka shong ha ka jingtrei shitom ba radbah jong ki nongmihkhmat, ki nongïalam ka seng, lem bad ki nongtrei ha ki shnong ki thaw.”
“Hynrei kumba nga ong, ka ilekshon ka dei ka ilekshon, to ngi ap ïa ka 4 tarik u Jylliew,” u la ong.
Haba jubab, u la ong, “Kaei kaba phi ïohi kam dei ka jingshisha kaba pura bad khatduh. Kumba phi tip, ka jingthep ‘vote’ ka long ka kam shimet bad ka bym don ba tip satia mano-mano bad kumta kan sa mih ka jingong…ki ilekshon ki dei ki ilekshon.”
Ha kajuh ka por, u la pynsngew ba ka long kaba eh than ban ai ka jingkheiñ kaba paka ha kum kane ka por.
Shuh shuh haba jubab, u la bynrap, “Hadien ba la dep phah ïa ka khubor jong ka jingïalap da u kyrtong bad ki nongïalam ka seng, ka la don ka jingkynriah khamtam haba ïadei bad ki paidbah kiba ïadon bynta bad ka seng, hynrei haduh katno kane kan ïarap ïa ngi ka dei kaei kaba ngin hap peit ha ka 4 tarik u Jylliew.”
