Shillong, Jymmang 21
U Vice-President ka United Democratic Party (UDP), Bah Allantry Dkhar u la ong ba ka National Testing Agency (NTA) lem bad ki bor pynïaid ka NEHU kim shym la pynkhreh bha haba ïadei bad ka eksamin Central University Entrance Test (CUET).
Kum ban shu kdew hangne, ki samla pule kiba la leit ban thoh ïa ka eksamin CUET kaba la long ha NEHU mynshem taïew ki la mad jingeh shi kat dei hadien ba la mih ki kynrum-kynram namar ka jingkynnoh jingbym biang ha ka rukom pynïaid ïa ka eksamin.
U Bah Dkhar u la ong ba haba phai sha ka CUET, ïa kane ka eksamin la pynlong da ka NTA ïa kaba la thung da ka Sorkar Pdeng.
U la ong ruh ba ka bynta ba khyndiat eh jong ka Sorkar Jylla haba ïadei bad katei ka eksamin ka long ha ka liang ka jingai jingmut kumjuh ban pynsngew sha ki bor pynïaid ka skulbah ban shim khia halor kane ka kam.
“Lada ki kam ki hap ban long ha kane ka rukom ha ka sien banyngkong, kata kan ym manbha na bynta ki samla ka Jylla hadien-habud khamtam ïa kito kiba kwah ban ïaid shakhmat bad ki jingpule ba shajrong jong ki,” u la ong.
Utei u nongïalam u la ong, “Ka jingkylla kaba khraw bad ka NTA lem bad ki bor pynïaid ka skulbah kim shym la pynkhreh bha.”
Haba kdew ba ki la mih shibun kiei-kiei na katei ka eksamin kiba hap ban shim khia, u la ong ba u la ïoh jingtip lyngba ki lad pathai khubor ba ka eksamin ka la kut haduh ka por 9:30 baje mynmiet.
“Kane ka donkam ïa ka jingpynshitom kaba tyngeh na ka liang ki bor ba dei khmih ïa ka CUET bad nga ban jur ïa ka Sorkar ban pynsngew sha ki bor ba dei khmih ban pyntikna ba kiba kum kine kin ym jia shuh hadien-habud,” u la ong.
Shuh shuh haba kylli, u la ong bynrap, “Lyngba ki jingkren u Myntri Rangbah bad Myntri ka tnad pule-puthi, la dep ban shim khia ïa kane bad ngi khmih lynti ba kan don ka jingpyrkhat ïa kito ki samla pule kiba shah ktah khnang ba kin ym duh ban jam shaphrang ha ka lawei jong ki.”
