Shillong, Jymmang 21
Ki pulit ka jylla ha ka Sngi Ba-Ar ki la pyntip ba uwei u nongshong shnong ka nongbah Shillong u la ujor ba ha ka 12 tarik Ïaïong, 2024, ka pisa kaba don haduh T. 99,928 ka la shah khate na ka ‘Credit Card’ kaba dei na ka Bank ICICI khlem ka jingtip jong u.
Ha kawei pat ka jingjia, ki pulit ki la ong ba uwei u nongshong shnong ka Jaisingpura Sultana, Rajasthan u la ujor ba ha ka 4 tarik Jymmang ha ka por kumba 5:20 janmiet, uwei na kiba ïatreilang bad u, u la ïoh ïa kawei ka ‘Phone Call’ na uwei briew ba la tip kyrteng kum u Ajay Charlie bad hadien, uta uba la ïoh ïa ka ‘Phone Call’ u la shah thok pisa kaba la kot sha ka T. 45,000.
Shuh shuh na ka liang ki pulit ki la pyntip ba u Nabajyoti Das, Cluster Manager ka Xpressbees kaba don ha New Bhaitbari, Rajabala (West Garo Hills), u la ujor ba u briew uba la ïatreilang bad u ha ka kam (Business Partner) ïa uba la tip kyrteng kum u Sarower Hossain, u la pyndonkam bakla ïa ka pisa kaba la kot sha ka T. 2,71,975 kaba dei ka pisa jong ka kompani.
Sa ha kawei pat ka jingjia, ki pulit ki la ïathuh ba u Chelfest Berry Nongrum u la ujor ba ha ka 19 tarik Jymmang ha ka por kumba 1:45 mynsngi, u la ïoh bat ïa arngut ki briew ïa kiba la tip kyretng kum u Ainingstar Sohshang (30 snem ka rta) bad u Shubash Thapa (38 snem ka rta), katba ki dang pyrshang ban tuh ïa ki ‘U-Channel’ bad kiwei na ka nala Wahthangsniang kaba don hajan ka Shillong Baptist Church.
Ha kawei pat ka khubor, ki pulit ki la ïathuh ba u Hrisikesh Roy, Assistant Manager (C), NPCC Ltd., u la ujor ba ha ka 17 tarik Jymmang, ki heh ka NPCC ryngkat bad ki shipai BSF ki la leit jngoh ïa kawei ka jaka ba dang shna ha Mikirpara Border Outpost, East Jaiñtia Hills, bad ki la lap ba ki runar ki la pynjulor bad lute ïa ki mar ki mata kiba shongdor kumba T. 2 lak na kane ka jaka.
Nalorkata, ki pulit ki la ong ba u Rahan Ali u la ujor ba ha ka 12 tarik Jymmang, ka thuk-thuk jong u (AS-17M-0711) ka la jah na ka Maternity Hospital, Tura katba u Chasin Marak u la ujor ba ha ka 17 tarik Jymmang, ka thuk-thuk jong u (ML-08H-3266) ka la jah na Tikrikilla, West Garo Hills.
Ha kawei pat ki jingjia, ki pulit ki la ïathuh ba ha ka 18 tarik Jymmang ha ka por kumba 8 baje mynmiet, ki runar ki bym lah ban ithuh ki la shoh la dat ïa u Tek Bahadur Thapa (34 snem ka rta) ha Khlieh Ïewduh, Shillong, bad la hap ban pynkit noh ïa u sha Civil Hospital, Shillong ban ai jingsumar hadien ba u la mynsaw malu-mala.
Shuh shuh ki pulit ki la ong ba ha ka 18 tarik Jymmang ha ka por kumba 10:30 mynmiet, ki runar ki la shoh la dat ïa u Ambase Thapa (40 snem ka rta) ha Jhalupara, Shillong, bad la rah ïa u sha Civil Hospital, Shillong ban ai jingsumar namar ka jingmynsaw.
