Shillong, Jymmang 21
Ki pulit ka East Jaiñtia Hills ki la ïoh ban kurup noh ïa u drok ‘Heroin’ uba shongdor haduh T.5 klur 50 lak bad ruh ban kem ïa uwei u nongkhaïi na kawei ka kali kaba wan na Silchar, Assam.
U Superintendent of Police (SP) ka EJH u Giri Prasad ha ka jingtip ba bniah ba u la ai, u la ong ba kane ka jingïoh kurup ïa utei u drok ka la long halor ka jingïoh jingtip kaba bniah ba don ki nongkhaïi kiba la wan kit drok da kawei ka kali na Silchar.
U la ong ba ki pulit ka Anti Narcotics Task Force (ANTF) ba la lamkhmat da u Additional SP lem bad ki ophisar ka thanat Lumshnong ki la pynlong ka jingtalasi ha Lumshnong bad ki la bat ïa kawei ka Tata Sumo kaba dang wan na Silchar Assam halor ka jingïoh khubor ba don ki nongkhaïi drok ba wan kit drok da kane ka kali.
La ong ba ha ka jingkhynra ïa kane ka kali la lap ïa 58 tylli ki synduk sabon ba la thep da u drok Heroin uba don ka jingkhia 609 gram bad ka dor jong une u drok ka long kumba T.5 klur 50 lak.
Une u briew uba shah kem, uba dei u trai jong une u drok u dei ba la tip kyrteng kum u Lalbiakdik Vaiphei ba 39 snem ka rta, ba shong ba sah ha Madanrting, East Khasi Hills, Shillong.
Na ka liang ki pulit ki la kurup noh ïa ka kali Tata Sumo bad ruh kawei ka Mobile Phone bad ki la pynrung ruh da ka ejahar hapoh ki kyndon ka NDPS Act pyrshah ïa utei uba shah kem.
Kane ka jingïoh kurup drok ki pulit kan dei ruh ka sien banyngkong hadien ka jingshimti jong ka Kong Idashisha Nongrang kum ka khlieh duh ka tnat pulit ka jylla ha ka Lah Sngi U Blei.
