Shillong, Jymmang 21
Ka Khasi Students’ Union (KSU) Laban Circle ka la ïoh ban shna haduh san tylli ki ïing ba la ker da ki tin ha Maxwelton Estate kaba don ha Laban na ka bynta phah sah ïa ki samla pule bad ki longïing kiba don khun don kti.
Haba ïakren bad u samla Reuben Najiar uba dei u President ka KSU Laban Circle, u la ïathuh ba ka seng ka la dep shna baroh san tylli ki ïing ha Maxwelton Estate khnang ban phah sah ïa ki para Khasi ki bym don jaka sah.
U la ïathuh ba nyngkong ka seng ka la ïoh ban shna tang kawei ka ïing ba la ker da ki tin. Hadien kata, ka la ïoh ban shna biang sa ar tylli bad mynta pat ka la ïoh ban shna biang sa ar tylli kiba kham haneng bad baroh lang ki long san tylli.
Shuh shuh u la pyntip ba ki ar tylli ki ïing la sah ki samla pule, hynrei mynta ki dang ïoh shuti ba ki dang leit sha shnong bad ar tylli kin sa sah ki longïing kiba don khun don kti kaba ka seng ka la pynkhreh ha kine ki sngi ba kin wan sah noh.
U la ïathuh biang ba ka seng kan dang shna biang ïa ki ïing ba la ker da ki tin ha katei ka jaka ban ai jaka sah ïa ki samla pule bad ki longïing baduk ki bym don jaka sah.
Kum ban shu pynkynmaw, ka jingleit shna ïing ka KSU Laban Circle namar ki bar jylla ki la sdang ban bun ban sah ha Maxwelton Estate kaba lah ban buh jingma ïa ka jaidbynriew lada kin dang wan kine kiwei ki jaidbynriew ha ki jaka ba dang lait.
Kumta ban nym ailad ïa kiwei ki jaidbynriew ba kin wan shna ïing ka KSU ka la mih shakhmat ban shna hi ïa ki ïing bad ban phah sah da ki Khasi ki bym don jaka sah.
