Shillong, Jymmang 21
Ka Kong Idashisha Nongrang kaba dang shu shimti thymmai kum ka Director General of Police (DGP) ka Meghalaya, ka la pyntip ba kan ïakynduh ïa ki paidbah ha man ka Sngi Palei na ka bynta ban ïakren halor ki jingeh bad kiwei ki jingdonkam.
Kane ka jingïakynduh paidbah ka DGP kan sdang naduh ka 30 tarik mynta u bnai ka ban long ha shlem treikam ka DGP kata hapdeng ka 11 baje mynstep haduh 2 baje nohphai sngi.
Ka jingthmu ba hakhmat jong kane ka jingïakynduh ka long ban sngewthuh ïa ka jingeh jong ki paidbah, kumno ban weng ïa ki jingeh ba ïakynduh da ki paidbah bad ruh ban wanrah ïa ka jingïadei bad ka jingïajan kaba khlaiñ hapdeng ki pulit bad ki paidbah.
Kumta ha kaba ïadei bad kane, na ka liang ka tnat pulit ka la kyntu ïa ki nongshong shnong jong ka jylla Meghalaya ban kin shim kabu ïa kane ka lad ban ïakynduh bad ka DGP na ka bynta ban ïakren ïa ki jingeh.
La pyntip ruh ba ka jingpdiang ïa ki kyrteng jong ki briew kiba kwah ban ïakynduh hapoh ka shlem treikam jong ka DGP kan long naduh ka por 10 baje mynstep haduh 11.45 mynstep.
