Shillong, Jymmang 21
Ha kawei ka jingjia ha West Khasi Hills, ki ‘riew runar kiba don kumba 10 ngut eiei ha kaba don napdeng jong ki kiba la kieng atiar, ki la ïoh ban lute pisa na uwei u bar jylla ha ka por ba u la poi ha Shallang bad ïa kata ka pisa, la lute da kaba pynbor ïa u ban phah lyngba ka rynsan UPI (Unified Payments Interface).
Ha ka khubor ba la ïohlum na ki pulit ha ka Sngi Ba-Ar, la ong ba uwei u briew ïa uba la tip kyrteng kum u Pranav Prabhat u la ujor ba ha ka 17 tarik Jymmang ha ka por kumba 6:30 janmiet katba u dang don ha lynti na Riangdo ha kawei ka kali kamai, shi kynhun ki runar kiba don kumba 4-5 ngut ki la wan mih ha ka por ba ka kali ka la poi ha Shallang.
Utei u nongujor u la ong ba kitei ki runar ki la kynroi ïa u bad ïa u nongñiah ïa kata ka kali kamai, bad kham hadien, ki la beh noh ïa uta u nongñiah katba ïa u pat, ki la tan sha khlaw bad ki la byrngem byrsit ïa u.
Nalorkata, u la ujor ba sa shi kynhun kiwei pat ki runar kiba la kieng atiar bad kiba la don kumba 4-5 ngut, ki la wan mih ha katei ka jaka, bad ki la dawa pisa na u bad ha kajuh ka por, ki la shoh la dat ïa u.
Kham hadien, kitei ki runar ki la pynbor ïa utei u nongujor ba un phah pisa T.61,500 lyngba ka UPI sha uwei u nombor/Account kaba don ïa ka kyrteng T. Abban.
