Shillong, Jymmang 21
Ha kawei ka jingjia, ka jingai jaka sah ïa ki arngut ki briew kiba u trai ïing um ithuh, ka la ïalam pynban sha ka jingjah jong ka pisa haduh T. 5.13 lak.
Katkum ka khubor ba la ïohlum na ki pulit, la ong ba uwei u briew na East Garo Hills ïa uba la tip kyrteng kum u Sengban G Momin u la ujor ba ha ka 14 tarik Jymmang ha ka por kumba 7:30 janmiet, uwei u doktor (Physician) ryngkat bad uwei pat uba la don lang bad u, kiba um ithuh satia, ki la wan sha ka ïing sah jong u ha ka shnong Dawa Mrongittim ban ai ïa ki dawai dashin na ka bynta u khun jong u. La ong ba kine ki arngut ki briew kiba u Sengban um ithuh satia ki la pan jaka sah ruh.
Hynrei, ha ka jingujor, u Sengban u la ong ba ha ka por kumba 11 baje mynmiet jong ka 14 tarik Jymmang, kitei baroh arngut ki la mih noh na ka ïing sah jong u.
Na ka liang u Sengban, ha ka jingujor, u la pynpaw ba ha ka step kaba bud, kata, ha ka 15 tarik Jymmang, u la lap ba ka pisa kaba T. 5.13 lak ka la jah na ka ïing jong u bad ka jingsuba ka long ba kiba la tuh ïa kane ka pisa ki dei kitei ki arngut kiba um ithuh satia.
