Shillong, Nailur 25
Ki nonghikai skul Deficit ba na ri lum Khasi-Jaintia bad Garo kiba don hapoh ka shatri jong ka Khasi Jaintia Deficit School Teacher Association (KJDSTA) bad ka Garo Hills Deficit School Teacher and Employes Association (GHDS&TEA) ki la ai por artaiew ïa ka Sorkar Jylla ban pyntreikam ïa ki mat jingdawa kata haduh ka 9 tarik u Risaw 2026.
Ki hajar ngut nong-hikai Deficit ba na Khasi Hills BAD Garo Hills ki la wan ban iashimbynta ha ka jingiad rally ba la pynlong da ka KJDSTA bad GHDS&TEA ha nongbah Shillong ïa kaba la sdang ïa katei ka jingiakhih naduh na khmat ka MBOSE ophis bad pynkud ha Madan Malki da kaba pynbud ïa ka jingïalang.
Ha ba ai jingkren ha ka jingïalang u Babu Boswell Pala u ba long ruh kum u President ka KJDSTA u la pynpaw ba ki don bun tylli ki mat jingdawa ba ki nonghikai ki la buh ha khmat ka Sorkar bad ba ka dei ban pynurlong.
Shuh-shuh u la pynshai ba ki nonghikai Deficit ki dawa na ka Sorkar Jylla ba ka dei ban pyndep noh ïa ka jingpyntreikam pura ïa ka Contributory Provident Fund (CPF) bad ïa ka National Pension System kumjuh ban pynlait noh ïa ka DA ba 51% kaba la sah kut naduh u bnai Naitung jong u snem 2026 bad ka 53% kaba dei naduh u bnai Kyllalyngkot jong u snem 2026 kumjuh ka Arear kaba long 43%.
Nalor kine, kiwei de ki jingdawa ki long ba ka jingnoh synniang ka CPF dei ban pyntreikam 10% na ka jingsiew tulop sha ki nonghikai bad ban pyndap noh mardor ïa ki kam nonghikai kiba thylli ha ki skul Deficit.
Shuh-shuh ka jingdawa ka long ban pyndam noh ïa ka Meghalaya Non-Government School and College Employees Centralised Provident Fund Scheme, 2026 ïa kaba la shna kyrpang tang na ka bynta jong ki nonghikai bad ki nongtrei Deficit.
La dawa ruh ban wanrah biang ïa ka Board of Trustees khnang ban pynthikna ban ym don kano kano ka jingleh tuh ha ka State Provident Fund (SPF) bad ban pyntreikam ïa ka Modified Assured Career Progression Scheme (MACPS) na ka bynta ki nongtrei bad ki nonghikai kiba don hapoh ka Difecit System.
Kine ki ar kynhun jong ki nonghikai Deficit ki la dawa ruh na ka Sorkar ba kan pynlait biang por noh man la u bnai ïa ka tulop jongki nangne shakhmat bad ban wanrah ïa ki rukom treikam kiba thymmai khlem da pyntlot ïa ka Deficit System kaba la don naduh mynshuwa.
“Lada baroh ki jingdawa kiba dei hok ka Sorkar kam lah ban pyndep hapoh ka tarik ba la buh ka 9 tarik Risaw, ngin ym don lad shuh da kumwei, hynrei sa tang ban pynlong ïa ki jingïakhih kiba jur ha baroh kawei ka Jylla” la maham u Babu Boswell.
U la pyntip ruh ba ka KJDSTA bad ka GHDS&TEA ki la aiti ïa ka dorkhas sha u Myntri Rangbah ka Jylla u Conrad K Sangma, “Ngi la thoh sha ka Myntri Rangbah ka Jylla ban pynurlong ïa kine ki mat jingdawa mynta la jan shibnai ka la ïaid naduh ba ngi la pan por ba ïakynduh,” la ong u Babu Boswell.
