Shillong, Nailur 25
Ki 3 ngut ki MLA ka UDP kiba la byrngem ban mih noh na ka seng hadien ki 8 ngut ki MLA ki la dep rung sha ka BJP, lada ki kwah ban mih noh ki lah ban mih hynrei ki hap ban rung ha kawei ka seng, hynrei lada ar ngut ki rung ha kawei ka seng bad uwei u rung sha kawei ka seng kin ngat ha ka ain kyntiap seng.
Haba pynthikna ia kane u bah Andrew Simon uba dei u nongai buit jong ka ophis u Lamphang ka iingdorbar thawain ka jylla u la iathuh haba ka UDP mynta ka la don satang 4 ngut ki MLA, lada mih lai ngut ka ain ka la shah tangba kin hap ban rung lang ha kawei ka seng namar lada ar ngut ki rung ha kawei ka seng sain pyrthei bad uwei u rung sha kawei kin nym lah ban phet na ka seng UDP.
Haduh mynta ki MLA ka UDP kiba sah ki long satang saw ngut kata u Bah Metbah Lyngdoh uba dei u President, Bah Paul Lyngdoh uba dei u Working President Bah Renikton Lyngdoh bad Bah Nujorki Sungoh.
La ioh khubor ba u Bah Paul, Bah Renik bad bah Nujor kin sa mih noh bad uba sah ha ka UDP ka long satang u Bah Metbah marwei.
Haduh mynta la kine ki lai ngut ki MLA ka UDP kiba la byrgnem ban mih noh kin leit iasoh bad kano ka sainpyrthei. Katba ki lai ngut ki MLA ka UDP kiba la shah pynsangeh treikam shipor ha ki nongialam ka UDP hadien ba ki la pynkhein ia ki kyndon treikam jong ka seng, kim shym la patiaw eiei hadien ba ki la rung sha ka BJP.
Kine ki lai ngut ki MLA ka UDP kiba la shah sospon ha ka UDP ki long u Bah Kyrmen Shylla na Khliehriat, Bah Olan Suin na Mawsynram bad Bah Matthew Beyond Kurbah na Mawphlang constituency.
Haba pyrshang ban iakren bad uwei napdeng kine ki lai ngut ki MLA kiba la shah sospen ha ka por ba ki leit aiti ia ka shithi sha ka ophis u Lamphang ka iingdorbar thawain ha Khyndailad, ki la pynpaw ba kim nym patiaw eiei ia ka shithi jong ka UDP kaba la sospen namar ki la dep rung sha ka BJP. Kum ban shu pynkynmaw ka UDP ka la dep pyntip sha u Lamphang ha ka 23 tarik mynta u bnai ba ki la sospen ia kine ki lai ngut ki MLA halor ka nongrim ba ki la pynkhein ia riti pyniaid kam ka UDP.
Ka jingleit pyntip ka UDP ha u Lamphang ka dei hadien ba ki la iohi ba kine ki lai ngut ki la rung sha ka seng BJP bad ki 5 ngut ki MLA ka UDP sha Delhi.
Haba iakren bad u nongaibuit u Lamphang ka iingdorbar thawain u Bah Andrew Simon u la iathuh ba ka shong ha ka rai jong u Lamphang ba un leh ia kine ki lai ngut hadien ba ka UDP ka la phah shithi sospen.
U la pyntip ki MLA ki lah ban wan pyntip hadien ia u lamphang haba ka jingdon briew ka la biang ban mih na kawei ka seng ban rung sha kawei ka seng.
