Shillong, Nailur 25
U Bah Paul Lyngdoh, MLA ka West Shillong Konstitwensi, u la ong ba ka jingrung ki 8 ngut ki MLA ka United Democratic Party (UDP) sha ka Bharatiya Janata Party (BJP), kadei namar ba kim hun ïa ka rukom pynïaid.
“Mynta don sa 4 ngut ki MLA bad yn sah beit sa tang u wei u MLA na ka party UDP ha ki sngi ban wan,” la ong u Bah Paul haba kren sha ki lad pathai khubor ha ka sngi Thohdieng jong ka taïew.
U Bah Paul u la ong ba ka don shibun ki rukom pynïaid ha ka party ki bym lah ban pynhun bad kaba sngewsih ka long ba ki nongïalam kiba don ha ka party, ki len beit ba kam shym don ka jingïathud ha ka party, ki ïa ryntih lang kawei ha ka party.
“Kane ka paw shai ba ka jingbat President ha ka party hapoh jong ka 3 snem, ngi ïohi ba ka party kaba la ïoh haduh 12 ngut na ki 36 tylli ki seat Khasi-Jaiñtia bad mynta la sah sa tang 4 ngut bad na ki 4 ngut ruh ki dak ki shin ki kdew, ba ka lah ban poi sa tang u wei u MLA na ka party,” u la ong.
“Ngam pat tip thikna, la ki MLA kin rung sha kano ka party, hynrei ki dak ki shin ki paw shai ba ki MLA kin sa dangdon ban rung noh sha kiwei pat ki party,” la ong u Bah Paul.
