Shillong, Nailur 25
U nongialam ka Congress u bah Vincent H. Pala u la buh jingkylli halor ka jingbteng jong ka UDP ban iatreilang bad ka kynhun synrop NPP-BJP hadien ba ki 8 ngut ki MLA jong ka, ki la leit pyniasoh bad ka BJP, da kaba ong ba kam don jingmut ban ujor katba dang iai bteng ban ïatreilang bad ki.
“Watla ka BJP ka la shim ïa ki MLA jong ka, hynrei nga tharai ba ka party UDP ka dei ban rai la kin dang don bad ka BJP-NPP ne kin weng noh. Ki la dei ban shim ïa ka rai lym kumta ym don jingmut ban ujor haba ki MLA ki la rung sha BJP lada ki dang ïatreilang bad ki,” la ong u Pala.
U Bah Pala u la ong ba kaei kaba la jia ia ka UDP kam dei kaba khlem khmih lynti ba ka BJP ka don ia ka histori ban pyntlot ia la ki jong ki paralok.
“Kam don kaei kaei kaba thymmai namar ba ka UDP bad ka BJP ki la ïatreilang la bun snem bad ka dei tang ka jingkylla na ka UDP. Kane ka jia bad ka BJP – ha Maharashtra bad ka Shiv Sena, kano kano ka party kaba ïatreilang bad ki kin pyrshang ban shet kylla ïa ki.”
U Bah Pala u la ong ba kane kan nym jia tang ia ka UDP hynrei kan jia sa ia ka NPP.
“Haba ka BJP ryngkat ki ‘agent’ jong ka BJP ha ka NPP ki pyrshang ban pynngop ia ki MLA ka Congress ban shim noh ia ki na ngi, ka UDP ka la rkhie bein ïa ngi. Mynta ka sngi haba ka BJP ka shim ïa la ki jong ki MLA, ka NPP ka rkhie bein ïa ka UDP. Kaba bud ynda ka BJP kan shim ïa ka NPP, kan dei ka jingrkhie kaba khatduh,” u la ong.
