Shillong, Nailur 25
Ki nongtrei ka Congress ha ka sngi Thohdieng ki la thang ïa ka dur jong u Chief Election Commi-ssioner ka ri India, u Gyanesh Kumar ha jaka ieng kali hajan ka Additional Secretariat da kaba kynnoh ba u la ïatreilang bad ka BJP ban leh tuh ia ka Election Commission.
Kane ka jingïaid paidbah ba la ïalam da u President ka MPCC u bah Vincent H Pala ka la sdang na Congress Bhavan bad la pynkut noh da ka jingthang ïa u tyngshop hakhmat Additional Secretariat.
“Kumba phi la iohi ha ka kot khubor, ka CEC ka la pyndonkam bakla ïa ka rukom treikam. Ha kine ki 10 bnai ba la dep, la pynmih 14 tylli ki jingkynnoh da ki arngut kiwei pat ki Election Commissioner hynrei um shym la sngap namar la iada da ka BJP,” la ong u Pala.
U la ong ba ka sorkar pdeng ka la pynkylla ïa ka ain ban plie lad ia ka jingleh thok.
“Ka BJP ka leh thok ïa ka bor jong ki paidbah namar ha Haryana ka Congress ka la dei ban jop, ha Maharashtra ka Congress ka dei ban jop bad ha West Bengal ka don ka jingleh thok kaba khraw, ka jingpyndam kaba khraw ia ki nongthep vote na ka thup kyrteng,” u la ong.
“Baroh ka thup kyrteng bad kiwei de la pyndonkam bakla ha Delhi da uwei u briew,” u la kynnoh.
Haba dawa ban risaiñ bad ban shah kem, u Pala u la ong, “Ngi dawa ba un hiar shuki bad risaiñ noh mardor. Hadien ba u la risaiñ, dei ban don ka komishon tohkit pyrshah ïa u, ngi dawa ba dei ban kem ïa u khnang ba ki briew kin don ka jingshaniah bad jingngeit ha ka riti synshar bad ha ka rukom treikam kaba ka Election Commission ka la pynïaid la slem bah.” Haba ai khublei ïa ka Youth Congress, ka Mahila Congress bad ki nongtrei ka party kiba la ïasnohkti lang ha kane ka jingïakhih wat hapdeng ka jingpynbna kaba lyngkot, u Bah Pala u la ong, “Ka rukom treikam ka la khyllem, ka BJP ka la leh thok. Kumta ngi don hangne bad ngi dawa ba dei ban kem ïa u bad ka BJP ka dei ban shim ia ka jingkitkhlieh.”
U la ong ba ka CWC kan sa ïakynduh shen ban rai ïa ka lynti treikam kaba hadien. “Ka jingiakhih mynta ka sngi ka dei ha ka kyrdan jong ka jylla, ngin sa leh ha ka kyrdan jong ka distrik,” la bynrap biang u Pala.
