Shillong, Jymmang 21
U kyrtong MP Lok Sabha jong ka Voice of the People Party (VPP), Dr. Ricky A.J Syngkon u la ong ba ka seng ka la dep khreh kot, ka la dep thoh ruh ïa ka eksam hynrei ka risol ne ka jubab na ki paidbah yn ap beit haduh ka 4 tarik Jylliew 2024.
Kane ka jingïakren bad u Dr. Ricky ka long ban sngap ïa ka jingsngew jong u haba ka sngi ñiew ‘vote’ ka sah satang artaïew ban kynjoh sha ka 4 tarik Jylliew 2024.
Ki paidbah ka jylla Meghalaya kata ha Shillong bad Tura constituency ki la dep thep ‘vote’ ha ka 19 tarik Ïaïong 2024.
U Dr. Ricky u la ong ba haduh mynta um lah ban ïoh jingkheiñ namar um lah ban ïohi haba ki paidbah ki rai marwei-marwei ha jaka thep ‘vote’ hynrei u don jingkyrmen ba ki paidbah kin rai ïa kaba bha tam.
“Kumba ngi la trei shitom ngi la pynshai sha ki paidbah ha ka por ilekshon ka long ruh kumba ngi la dep khreh kot, ngi la dep thoh ruh ïa ka eksam bad mynta ngin ap satang ïa ka jubab ha ka 4 tarik jylliew 2024” u la ong.
Ki kyrtong kiba la mih madan ban aireng ha kane ka ilekshon MP na Shillong constituency ki don haduh hynriew ngut kata u Dr. Ricky A.J Syngkon na ka VPP, Bah Vincent Pala na ka Congress, Kong Ampareen Lyngdoh na ka NPP, Bah Robertjune Kharjahrin na ka UDP, Bah Lakhon Kma bad Peter Shallam kum ki kyrtong shimet.
Kane ka jingslem ban ñiew ïa ka ‘vote’ kaba ki paidbah ki la dep rai ha ka 19 tarik Ïaïong ka long ban ap lang haduh ban da pyndep thep ‘vote’ ha kiwei ki jylla khnang ban ïoh ñiew lang ha kajuh ka sngi kata ha ka 4 tarik Jylliew 2024.
