Shillong, Jymmang 21
Ha ka hukum kaba la pynmih ha ka 20 tarik mynta u bnai, u Deputy Commissioner (DC) ka East Khasi Hills u la ong ba dei ban plie biang mardor ïa ka kam khaïi bar-ri na Majai Land Custom Station.
Ka jingpynmih ïa kane ka hukum ka long halor ka jingïoh pdiang jingtip ba ka la don ka jingkhang surok khlem da ïoh bor da u Syiem ka Hima Sohra ïa ka surok na Umdud sha Zero Point, kaba la ïalam sha ka jingkhang khyrdep jong ka kam khaïi bar-ri lyngba ka Majai Land Custom Station.
Ha ka hukum ba la pynmih, u DC u la ong ba ka jingkhaïi na Majai ka dei ban sdang noh mardor bad ha kajuh ka por u la ong ba kano-kano ka jingpynkheiñ ïa kane ka hukum, yn leh da kaba tyngeh katkum ki kyndon jong ka aiñ.
Kum ban shu kdew hangne, u Syiem ka Hima Sohra u la thoh sha u Superintendent ka Majai Land Custom Station halor ka jingkhang khlem buh por ïa ka surok Umdud-Zero Point ha kaba u la ong ruh ba ka jingpyrkhing u District Magistrate ka East Khasi Hills ban lum bai musur ka dei kaba long mar pyrshah bad ka hukum kaba shipor jong ka Meghalaya High Court kaba la shah ïa ka Hima ban lum T. 200 kawei ka kali haba pyndonkam ïa ka surok na Umdud sha Zero Point da kaba bthah ruh ban pynbha ïa kane ka surok.
U Syiem Sohra u la ong ba u District Magistrate ka East Khasi Hills lyngba ka hukum kaba 10 tarik Jymmang, 2024 u la pyrkhing ban lum bai musur ha kane ka surok katkum ka rukom synshar kaba la ju leh da ka Hima tangba ka High Court ka la pynmih ïa ka hukum ha ka 13 tarik Ïaïong, 2022 ha kaba ka la shah ban oh khajna T. 200 kawei ka kali.
U la ong ba wat ka Ïingbishar lyngba u Chief Justice barim, u Sanjib Banerjee bad Justice W. Diengdoh ha ka rai kaba 2/6/2022 la pynpaw bad pynsngew biang ba ka Hima Sohra Syiemship ka don ka bor ban lum khajna bad kane ka rai ka pynksan ïa ka rai jong u nongbishar ba marwei kaba ha ka 13 tarik Ïaïong, 2022.
U Syiem u la ong ba kane ka jingpyrkhing u District Magistrate ban pyrkhing ïa u Syiem Sohra ban lum khajna ka dei kum ka jingkheiñ poh ïa ka hukum jong ka Ïingbishar.
La ong ruh ba kane ka jingkhang ïa ka surok ka dei ha ka por ba dang don ka jingbym shongsuk-shongsaiñ ha Majai ha kaba ka Hima Sohra ka la pyrshang ban pynbeit ïa ki jingeh kham kloi ban poi sha ka jingsngewthuh lang.
Kumta ban lait na kano-kano ka jingbym shongsuk ha ka thaiñ, ka jingkhang ïa ka surok ka dei kaba donkam ban tem ruh ïa ka jingïashit kaba lah ban mih bun ki jaka.
U Syiem Sohra u la ong ba un sa ai ‘show cause’ halor ka jingbym pynbha ïa ka surok da u kontraktor u Bah Tamdor Sing Nadon uba ka ophis Hima Sohra ka la bynshet ha u ban pynbha ïa kane ka surok man ka por kumba la ïa kut bad u namar ka mih ka jingujor ba khlem pynbha ïa ka surok kumba la ud da ki nongshong shnong ka Majai.
Kumta u la ong ba ka rai kaba 16 tarik Jymmang, 2024 ka long ban khang ïa ka surok bad kan bteng tad haduh ban da dep bishar ïa ka mukotduma (Writ Petition of W.P.C No 114 of 2022) kaba dang sahteng ha Meghalaya High Court.
Shuh shuh u la ong ba lada don mano-mano ba sngew wit namar kane ka hukum ban khang ïa ka surok kaba la hukum da ka Hima Sohra bad ka Dorbar ki lah ban leit sha Ïingbishar ne sha kino-kino ki bor.
