Shillong, Jymmang 21
Ka seng Hynñiewtrep Integrated Territorial Orga-nization (HITO) sengkmie hapoh ka jingïalam jong u President u Bah Donbok Dkhar, ha ka Sngi Ba-ar ka la leit ban pynher krad ïa ki khynnah kiba ju shong thad lad hakhmat ka Civil Hospital Shillong ïa kiba la suba ruh ba ki dei kiba ju pyndonkam ban dih ïa u drok.
Haba kren sha ki lad pathai khubor, u Bah Donbok u la ong ba ka jingwan jong ka seng ka dei halor ka jingïoh jingujor na kiba bun ki paidbah ba ki ju don ki briew kiba ju wan shim dawai na ka Oral Substitution Therapy (OST) kaba dei ka jaka ai jingsumar na ka bynta kiba la kyrni ha u drok kaba don ha katei ka jaka bad hadien ba kitei ki briew ki la dep ban shim dawai ki ju shong thad lad bad pynwit ruh ïa ka lynti ïaid jong kiwei pat ki briew kiba wan shim dawai na katei ka jaka ai jingsumar.
Ha kane ka jingleit kyndang ka seng ïa kitei ki briew, ka la ïoh ban pynher krad haduh 7 ngut ki briew kiba shong thad lad kiba dei ruh ki bar jylla bad ki la don ruh kiba la phet noh mar sien ïoh jingtip ba la wan ka seng.
U Bah Donbok u la ong ba ka seng ka la leit ruh ban ïakynduh ïa ki bor ba dei khmih jong ka Civil Hospital Shillong halor kane ka bynta.
Kumta ka seng ka la phah ruh ïa ka kyrwoh sha baroh ki briew kiba wan shim dawai bad khamtam ïa kito kiba la kyrni ha u drok ba lada ki wan shim dawai na katei ka jaka ai jingsumar ki dei ban shim da ka akor ka burom. Nalor nangta kim dei satia ban ïa shong thad lad ha katei ka jaka bad lada ka seng kan lap biang ïa kum kine ki jait briew kiba ju mlien ban shong thad lad kumne, ka seng sa wan beh beit naphang ïa ki.
“Hapoh kane ka jaka ki bun kiba thiah pang kumta ngi kyntu ba wat pynwit ïa ka ïaid ka ïeng jong ki paidbah kiba wan shim dawai nangne. Na ka liang jong ngi, ngin ïai bteng ïa kane bad ngi la aiti ruh ha ka Shillong City ba kan peitngor manla ka sngi,” la bynrap u Bah Donbok.
U Bah Donbok u la ong ruh ba ka sienjam ba ka seng ka la shim ka long ba man la ka sngi naduh ka por 10 baje mynstep haduh 12 baje mynsngi, na ka liang ka HITO Shillong City kan sa wan ban peitngor ïa katei ka jaka khnang ban tehlakam ïa ka jingwan shong thad lad jong kitei ki khynnah kiba wan shim dawai na katei ka jaka.
