Nongstoiñ, Jymmang 21
Ka Hynñiewtrep You-ths’ Council (HYC) West Khasi Hills Dis-trict ryngkat ka HYC Nongstoiñ Circle ki la pynpaw ka jingsngewdiaw kaba jur ïa ka lawei ki khun samla ka thaiñ bad ka District namar ka jingnang jyllei ki kam dih bad khaïi drok katba nang mih ki sngi.
Halor kane ka phang, ha ka Sngi Ba-ar ka HYC ka la leit ban ïakynduh ïa u Deputy Commissioner (DC) ka West Khasi Hills bad ban aiti ruh ïa ka dorkhas ha kaba la pyntip ba tang ha kine ki artaïew ba ka HYC ka la mih shakhmat ban khynra ïa ka ïew Nongstoin, ka la lap haduh kumba 20 ngut ki nongdih drok.
Shuh shuh ki la pynpaw ruh ba ha ka jingkhynra, ka HYC ka la lap ruh ba ki don kiba die ruh ïa u drok da kaba ki rah khyndiat-khyndiat bad kane ka la nang pynsyier mynsiem ïa ki paidbah namar haba jyllei kine ki kam, ka tuh ka thiem ruh ka jur bha.
“Ngi kum ka seng ngi la aiti sha ki Pulit ïa ki briew bad ngi la thang ïa u drok ba la ïoh kurup bad ha kaba ngi la ïarap ban sneng bad kyntu ruh ïa kito kiba la lap ba kin kylla noh ka jingim ba thymmai bad ha kajuh ka por ngi maham ban nym pynjot ïa kiwei,” la ong ka dorkhas ka HYC ba la aiti sha u DC.
Kumta halor kane, ka HYC ka la buh ïa ki katto katne ki mat ban kyrpad ïa u DC ba ka seng ka kwah tip ka kam bad ka thong jong ka tnat Pulit lyngba ka Anti Narcotics Task Force (ANTF) halor ka jingjyllei u drok ha Nongstoiñ bad hapoh ka District baroh kawei, namar katba nang mih ki sngi ki la nang jyllei.
Ka HYC ka la ai jingmut ruh ban pynkhlaiñ ki jingkhynra ban wanrah ïa ka suk ka saiñ.
Kaba ar pat, ka HYC ka la kyrpad ïa u DC ba un ïakren bad u Syiem ka Hima Nongstoiñ ban pynpra noh ïa ki ïing ba la jot rathai bad ki ïing kiba kylla long kum ka ktem jakhlia hapoh ka ïew khnang ban ym don ba pyndonkam ïa ki bad ban ym shah shuh ban sah hapoh ïew Nongstoiñ kumba la ju maham ha ki snem ba la dep.
Ka HYC ka la kyrpad ruh ban pynlong ka jingleit jurip ha kano-kano ka por ïa katei ka jaka na ka bynta ban lap ïa ka jingshisha.
Ha kawei pat ka liang ka HYC ha ka dorkhas ka la pyntip ba ka la ïakynduh ruh ïa ki nongdih drok kaba kam kwah pat ban pynpaw kyrteng ha kaba ki don kiba la phla hok ba ki la shah-teh shah-khum ne longmraw ha ka jingdih ha kane ka jingmlien bad ym tang ma ki hynrei sngew synei ruh ïa ki kmie ki kpa kiba longmraw namar ki khun namar kim lah tang ban leit buh ha jaka sumar (Rehab Centre) namar ka jinglut kaba bun.
Ka HYC ka la ong ruh ba ka jingkhynra kam dei tang ban lap ïa ki nongdih hynrei ka kwah ban pynduna bad ïaleh ban rat dyngkhong namar kum ka seng ka sngew kitram bad sngewkhia bad sngewsynei ïa ki bad ka kyrpad ban ïarap bei tyngka ïa ki kmie kpa ban sumar ïa kito kiba la thrang ban kylla bamut noh.
Shuh shuh la ong ba na ka bynta ban shngaiñ ka ïew ka hat, ki nongdie jingdie ha ïew Nongstoiñ khamtam ha Khlieh ïew bad hajan Them ïew, ka HYC ka kyrpad ïa u DC ban phah pahara janmiet naduh 4 haduh 8 baje man ka sngi haduh ban da khang dukan namar kim shngaiñ shuh.
Ka HYC ka la kyrpad ïa u DC ba un shim khia ban ïarap lem ha ka ban pynkhlaiñ ka jingpahara bad ki Police Check Point khamtam ha ki ïew khappud bad ruh ki khyrdop kiba rung ha ka District.
