Jowai, Jymmang 22
Ki thylliej ding kiba klang bha ki la ïoh ban bam duh naphang ïa ka ïingmane jong ka Balang Presbyterian Mupliang kaba hap hapoh ka Nangbah Nangjngi Hadem Presbytery.
Kane ka jingpluh ding ka la jia ha ka step phyrngab jong ka Sngi Balang ha ka por kumba 1.30 baje eiei. Ha kane ka jingjia ym shym la don satia mano-mano ba mynsaw.
Wat la ka kali pynlip ding ka la wan poi ha katei ka jaka, hynrei ym shym la lah ban leh eiei naba ka ding kaba klang ka la ïoh ban bam ïa kane ka ïingmane. Ki jingdon jingem baroh hapoh kane ïingmane ba kynthup naduh ki kor pynsawa, ki tiar tem tiar put, ki shuki nalor kiwei kiwei ki tiar kyrpang ba pyndonkam ha ka por jingïaseng heh ki la ingkhong khait.
Haba ïoh ban ïakren bad u Bah P Ryngkhlem uba dei u dkhot ka Committee Balang u la ïathuh ba ka daw jong ka jingpluh ding, ka lah ban dei na ka jingthut jong ka bording ilektrik.
U la pyntip ba kane ka ïingmane ka dei kaba dang shu dep tei ha u snem 2008 kaba dang dap 15 snem. Ha kane ka jingpluh ding ka jingjulor ka la kot sha ka 1.5 klur tyngka.
U la ïathuh ba ki dkhot jong ka Balang ha Mupliang ki don kumba 800 ngut tam.
