Shillong, Jymmang:
Ka Hulladek Recycle ha ryngkat ka jingïatreilang bad ka Meghalaya State Pollution Control Board (MSPCB) ha ka 21 tarik u Jymmang 2024, ki la pynlong ïa ka E- Waste Management Summit 2024 Meghalaya Chapter kaba la pynlong ha Shillong Club.
Ha kane ka sngi la ïadonlang ruh da u Chairman ka Meghalaya Pollution Control Board, u R. Nainamalai, u Member Secretary ka Meghalaya Pollution Control Board, u Dr G.H Chyrmang bad u nongseng uba dei ruh u CEO jong ka Hulladek Recycle, u Nandan Mall.
Ka thong ba la pynlong ïa kane ka E-Waste Management Summit ka long ban pynshlur bad wanrah ïa baroh ki kynhun ban ïakren bad ïathir sani bha halor ki mat ba kongsan bad ki sienjam kiba ïadei halor kumno ban pyndonkam biang ïa ki tiar ki tar kiba la rim kum ki Television, ki battery bad kiwei kiwei ki tiar khnang ba kan ym don kano-kano jingpynsniew bad jingpynjot ïa ka mei mariang.
Haba ai jingkren ha katei ka Summit, u R. Nainamalai, Chairman ka Meghalaya Pollution Control Board, u la ong ba ka Meghalaya Pollution Control Board ka dei kaba shim ka jingkitkhlieh ban ai jingkyrshan ïa ki sienjam ban wanrah ïa ki jingkylla ha ka rukom ban pyndonkam biang ïa ki tiar ki tar kiba la rim ha ka rukom stad kane ka juk kaba mynta.
Na ka liang u nongseng uba dei ruh u CEO ka Hulladek Recycle Nandan Mall, u la ïathuh ba ki don ïa ka thong ban buh ïa kine ki jaka bret ha ki 50 tylli ki jaka ha kylleng sawdong ka jylla. U la ong ruh ba u don ka jingkyrmen ba kin lah ban pynurlong ïa kane ka thong kaba ki don na ka bynta ka jingmyntoi jong ki paidbah.
U la ïathuh ruh ba ka Hulladek Recycle ka la don hapoh ka jylla Meghalaya mynta la lai snem kynthih bad mynta ki la shim ïa ka rai ban shim ïa kane ka sienjam ban ai jingpynshai sha ki paidbah halor kine ki E-waste bad kiei ki jingma kiba ap lada bret pathar ïa kine ki tiar ki tar.
