![Bthah ka ECI ïa ka BJP bad Congress ban sangeh ïalap ilekshon ha ka liang ka kyrdan, jaidbynriew bad ka niam mallikarjun_nadda](https://unongsainhima.com/wp-content/uploads/2024/05/mallikarjun_nadda.jpg)
New Delhi, Jymmang 22 (UNI)
Ka Election Commission of India (ECI) ha ka Sngi Balang ka la bthah ïa ka BJP bad Congress ban ym shah ïa ki nongïalap ilekshon ba hakhmat jong ki ban pynmih ne kren ïa ki kyntien kiba lah ban phiah ïa ka imlang-sahlang bad kiba lah ban wanrah jingïakynad hapdeng ki kyrdan bad ki jaidbynriew bapher-bapher.
Ha la ki jong ki jong ki shithi – sha u President ka BJP, J.P. Nadda bad President ka Congress, u Mallikarjun Kharge, ka ECI ka la bthah shai ïa ki nongïalap ilekshon ba hakhmat jong ki ban sangeh shi syndon ban ïalap ha ka liang ka niam bad ka jingsngewpher jaidbynriew.
“Ka sawdong-sawkun ka imlang-sahlang bad lariti ka India ka dei kaba ïaineh bad ka ban ym lah ban shah ktah namar ki ilekshon,” la ong ka ECI.
“Yn ym shah ïa ki 2 tylli ki seng heh ban pyntlot ïa ka dustur jong ka jingmanbha ka jinglong-jingman ka ilekshon jong ki nongthep ‘vote’ ka India,” la ong ka ECI ha ka hukum jong ka.
Ka la thoh sha u President ka BJP, Nadda ban bthah ïa la ki nongïalap ilekshon ba hakhmat ban ym pynmih ne kren ïa ki kyntien kiba lah ban phiah ïa ka imlang-sahlang.
Katei ka kyrwoh kaba la poi sha u Nadda ka la wan hadien ka jubab jong u ha ka 13 tarik u Jymmang ïa ka jingpynbna ba la phah sha u halor ka jingujor pyrshah ïa ka jingkren u Myntri Rangbahduh ka ri, u Narendra Modi ha Banswara mynshem bnai.
Ka ECI ka la kyntu ruh ïa ka BJP bad Congress ban sangeh ha ka ban ïalap ha ka liang ki kyrdan, jaidbynriew, ktien bad ka niam.
Nalor u Nadda, ka ECI ka la phah ruh ïa kaba kum katei kajuh ka shithi sha u Kharge ban phah jubab ïa ki jingujor na ka liang ka BJP pyrshah ïa u bad u nongïalam ba rangbah ka seng, Rahul Gandhi haba ïadei bad ki jingkren jong ki.