Shillong, Jymmang 22
Ka jingbuddien ka Khasi Students’ Union (KSU) Sengkmie bad ka KSU Manipur Unit ka la pynlong ïa ka Lat jong ka jylla Manipur ka Anusuiya Uikey ba kan bthah ïa u Deputy Commissioner ka Tamenglong District bad u Deputy Commissioner ka Jiribam District ban pynbeit ïa u pud ha ki shnong Khasi.
Haba ïakren bad u General Secretary ka Khasi Students’ Union (KSU) samla Donald Thabah, u la pynpaw ka jingsngewkmen haba ka Lat jylla Manipur ka la shah shkor ïa ka jingkyrpad ka seng ban phah tuklar mardor ha ar ngut ki DC ban pynbeit noh ïa u pud u sam haba ïadei bad ki shnong Khasi kiba sah ha kitei ar tylli ki district.
U la ong ba kane ka jingphah jingthoh ka seng sha ka Lat ka jylla bad sha u Myntri Rangbah ka jylla Manipur ka dei namar ki Khasi kiba sah ha Manipur ki ju shah pyndik ha kiwei pat ki jaidbynriew kum ki Bengali.
U la ïathuh ba ki Khasi ki don ha lai tylli ki shnong kiba im da kaba rep tympew bad kwai bad kiwei mar rep.
Shuh shuh u la pyntip ba kitei ar ngut ki DC kin sa sdang ban jurip ïa ki shnong ki thaw hadien ba la dep ñiew ‘vote’ jong ka ilekshon MP Lok Sabha kata hadien ka 4 tarik Jylliew 2024.
Haba ïadei bad ka shongsuk-shongsaiñ ha Manipur, u samla Donald Thabah u la ïathuh ba ki Khasi kiba sah ha Manipur kim ju shah pyndik naduh ba sdang ka jingïakhih.
U la pyntip ruh ba wat ki samla pule kiba pule ha Imphal kim ju shah pyndik namar ka KSU ka la dep ïakren bad ki jaidbynriew Meitei bad Kuki ba kim dei ban pyndik.
U la pynkynmaw ha ka por ba jur bha ka jingïakynad hapdeng kitei jaidbynriew (Meitei bad Kuki), ki Meitei ki ju synran ruh ïa ki samla Khasi shaduh ki kad liengsuiñ.
