Tura, Jymmang 22
U MDC ka Tura bad nongïalam ka BJP, u Bernard Marak u la buh jingkylli hadien ki jingjia kiba la mih haba ïadei bad ka jingkhrong khajna arsien na ki nongkhaïi ‘riewlum da ki nongwai ‘haat’ wat la ki siew ïa ka bai mar jong ki sha ka Garo Hills Autonomous District Council (GHADC).
“Ki ‘riewlum ka Ri-lum Garo ki shah pynbor ban siew ïa ka khajna ba khlem ïoh jingbit da katto-katne ki nongwai ‘haat’. Ka jingkhrong khajna arsien bad jinglum pisa be-aiñ kaba khlem ïoh jingbit da katto-katne ki ‘riew shimet ka jur bha ha Ri-lum Garo,” kam u MDC.
U Bernard u la kdew ruh ïa uwei u nongshim wai ‘haat’ uba wat la ki nongkhaïi ki siew hok ïa ka jingsiew sha ka GHADC, u dang pynbor pat ïa ki ban siew shuh sa kumba san shah ban ïa kaei kaba ki siew sha ka GHADC.
“Ka GHADC ka la ai wai ïa ki ‘haat’sha katto-katne ki ‘riew shimet ban khrong khajna halor ka jingwan poi ki mar sha ïew ha ka sngi ïew, hynrei ïa kane ka laisen la pyndonkam bakla da katto-katne ki ‘riew shimet ban khrong khajna be-aiñ na ki nongkhaïi ‘riewlum harud surok, kiba shalan ïa ki mar jong ki kum u kwai, jhur bad kiwei-kiwei shabar Jylla,” la bynrap u Bernard.
U MDC u la ong ba ki nongwai ‘haat’ kim lah ban khrong khajna ha ki rud surok namar ka GHADC ka la pynbiang ïa ki syrnot ai jingbit sha ki nongkhaïi ha kaba ki nong saplai ki hap ban siew T 10/- shi byrni ha shuwa ban shalan ïa ki mar jong ki sha kiwei-kiwei ki jaka.
“Katto-katne ki nongwai ‘haat’ da ka bor ki lum be-aiñ T 50/- shi byrni na ki nongkhaïi ‘riewlum kaba long be-aiñ bad kaba khlem ïoh jingbit. Yn sa ujor ejahar mardor halor kane. Ki la don ki jingujor ba la ujor sha ki bor pynïaid ka GHADC bad dei ban pyndam ïa ki laisen jong kito kiba pyndonkam bakla ïa ki,” pynpaw u Marak.
“Balei u juh u nongkhaïi u shah khrong khajna arsien na bynta u juh u mar? Kane ka jia ha man ki distrik. Ha kawei na kine ki jingjia, u nongshong shnong ka konstitwensi jong nga u la shah byrngem ha u nongshim wai ha Tosekgre, hapoh konstiwensi jong nga. Dei ban leh eiei halor kane,” la ong u Bernard.
