Shillong, Jymmang 22
Ha ka sien kaba nyngkong, ka kynhun Mawjam Event Network (MEN) kaba dei ka Event Management ka la khot bad wer ïa ki paidbah ka jylla kiba ju sngewtynnad ha ka put ka tem bad ki jingrwai ba kin wan ban sngap bad ïashimbynta ha ka rakhe sngi-kha 83 snem jong u Bob Dylan ne ka ‘Bob Dylan’s Day’.
Kane ka dei ka jingrakhe ha ka sien kaba 53 hapoh ka jylla kaba la ju pynlong da ka Lou Majaw Foundation. Ha kane ka kynti kaba mynta la shimti noh da ka Mawjam Event Network ban pynlong ïa kane ka jingrakhe.
Na ka liang u samla Edwigh Eddie Majaw uba dei u nongseng ïa ka Mawjam Event Network, u la ïathuh ba katei ka jingrakhe kan sa long ha ka 23 tarik bad ka 24 tarik u Jymmang ka ban pynlong ha U Soso Tham Auditorium naduh ka por 5 baje haduh 9 baje mynmiet.
U samla Edwigh u la ong ba ha ka 23 tarik kan sa don ka ‘Bob Dylan’s Day Sound Contest’ bad ha ka 24 tarik pat kin don bun ki nongrwai jong ka jylla bad na kiwei pat ki jaka kin wan ban pynsngewtynnad ha katei ka sngi kiba kynthup ïa u Bah Lou Majaw uba dei uwei na ki nongrwai ba pawnam ka jylla, u Bah Paul Lyngdoh uba dei u Myntri ka Sorkar Jylla nalor kiwei-kiwei ki nongrwai ba paw ka jylla.
“Ka jingthmu jong kane ka jingïakob ka long ba ngi kwah ban ailad ïa ki khun samla jong ka jylla jong ngi ba kin wan shakhmat ban pynshlur ïa ki”, la ong u samla Edwigh.
U samla Edwigh u la ong ruh ba katei ka jingïakob rwai, ki nongïashimbynta ki dei ban rwai tang da ki jingrwai jong u Bob Dylan lane da ki jingrwai kiba ki hap ban shu thoh hi.
U la ong ba ha kiba bun ki rynsan ïakob, ki nongïashimbynta ki ju rwai da ki jingrwai jong kiwei pat ki nongrwai hynrei ha kane ka jingïakob pat, ka Mawjam Event Network ki pynshlur ïa ki samla kiba don ïa ka sap ban rwai ba kin mih shakhmat ban wan ïashimbynta ha kane ka jingïakob.
Ha katei ka jingïakob, ki nongjop ha ka kyrdan kaba nyngkong kin ïoh rah ïa ka song pisa T.15,000, ba ar kin ïoh rah ïa ka song T.10,000 bad kiba wan ha ka kyrdan ba lai kin ïoh T.5,000 ha ryngkat ki khusnam bad ki syrnod sha ki nongjop.
Shuh shuh ha katei ka jingrakhe kan sa don ruh ka jingïakren ïathir halor ka put ka tem bad ka jingïaid lynti jong u Bah Lou Majaw kum u nongrwai ba pawnam ka jylla bad halor ka rukom long ka put ka tem hapoh ka jylla ha ka por mynshwa bad mynta.
Ha katei ka jingïathir ïatai halor ka put ka tem, kin sa don 7 ngut ki nongïashimbynta ha kaba u nongpynïaid ïa katei ka jingïathir un dei u Bah David Laitphlang.
